හිසකෙස් වර්ණ ගන්වන ව්‍යාජ ආලේපන පිළිබඳව විමසිලිමත් වන ලෙස පාරිභෝගික කටයුතු පිළිබඳ අධිකාරිය ජනතාවට දැනුම් දෙයි. ප්‍රසිද්ධ වෙළෙඳ නාමයක් ව්‍යාජ ලෙස යොදාගනිමින් සැකසූ හිසකෙස් වර්ණ ගන්වන ආලේපන වෙළෙඳපොළේ අලෙවි කළ ව්‍යාපාරික ස්ථාන වැටලීමට පාරිභෝගික කටයුතු අධිකාරිය පසුගිය දිනවල කටයුතු කරනු ලැබීය.
වෙළෙඳපොළේ මෙවැනි ව්‍යාජ නිෂ්පාදන අලෙවි කිරීම වැළැක්වීමට පාරිභෝගික කටයුතු පිළිබඳ අධිකාරිය නිරතුරුවම කටයුතු කරන අතර, භාණ්ඩ මිලදී ගැනීමේදී මෙවැනි ව්‍යාජ නිෂ්පාදන සම්බන්ධව විමසිලිමත් වන ලෙසත් සහ එවැනි අවස්ථා පිළිබඳ තොරතුරු වෙතොත් පාරිභෝගික කටයුතු පිළිබඳ අධිකාරියේ කෙටි දුරකතන අංකය වන 1977 වෙත දැනුම් දෙන ලෙසත් පාරිභෝගික කටයුතු පිළිබද අධිකාරිය ජනතාවගෙන් ඉල්ලා සිටී.
නිවැරදි හිසකෙස් කළු කරන ආලේපනයේ අනු ඇසුරුමක බර 21gක් වන බවත් ව්‍යාජ නිෂ්පාදනයේ අනු ඇසුරුමක බර 10gක් වන බවත් අධිකාරිය කියයි.
පිටකොටුව පැරණි නගරශාලා ගොඩනැඟිල්ලේ සහ පීපල්ස් පාර්ක්හි වෙළෙඳුන් තිදෙනෙකු සම්බන්ධව සිදු කරන ලද මෙවැනි වැටලීම්වලින් අනතුරුව එම වැරදි සම්බන්ධයෙන් මාළිගාකන්ද මහේස්ත්‍රාත් අධිකරණයේ නඩු පැවරීමෙන් පසු වරද පිළිගත් ව්‍යාපාරිකයන් දෙදෙනකුට දඩ මුදලක් සහ අත්අඩංගුවට ගනු ලැබූ ඇසුරුම් විශාල ප්‍රමාණයක් රාජසන්තක කර විනාශ කිරීමට අධිකරණය නියම කළ බවද එම අධිකාරිය සඳහන් කළේය.
