අමෙරිකාවේ ජනාධිපති ධුරයෙන් නික්ම යෑමට නියමිත ජෝ බයිඩ්න් සහ චීන ජනපති ෂී ජින්පින් අතර අවසන් රාජ්‍යතාන්ත්‍රික හමුව පේරු රාජ්‍යයේදී පැවැති බව විදෙස් මාධ්‍ය වාර්තා කළේය. ලොව බලවත්ම රාජ්‍යයන් දෙකක නායකයන් ලෙස දෙදෙනාගේ අවසන් හමුව සිදුවී ඇත්තේ පේරු රාජ්‍යයේ ලීමා අගනුවර පැවැති ආසියානු පැසිෆික් ආර්ථික සහයෝගිතා වාර්ෂික සමුළුවේදී බව විදෙස් මාධ්‍ය වැඩිදුරටත් වාර්තා කළේය.
ජෝ බයිඩ්න්ගේ ධුර කාලයේදී බරපතළ ලෙස බිඳවැටුණු දෙරට අතර සබඳතාව නව ජනාධීපති ඩොනල්ඩ් ට්‍රම්ප්ගේ පාලනය යටතේ නැවත පිළිසකර කරගැනීමට චීන ජනාධිපතිවරයා කටයුතු කරනු ඇතැයි ද, ඔහු මේ පිළිබඳ ජෝ බයිඩ්න්ට ප්‍රකාශ කර ඇතැයි ද විදෙස් මාධ්‍ය සඳහන් කළේය.
චීනය සහ අමෙරිකාව අතර පවතින සබඳතාව ගෝලීය වශයෙන් වඩාත් වැදගත් වන අතර, එය නිවැරැදිව කළමනාකරණය කිරීමට නොහැකි වුවහොත් ගෝලීය වශයෙන් බලපෑම් එල්ල වනු ඇති බැවින් අමෙරිකාවේ නව ජනාධිපතිවරයා සමඟ සමීපව කටයුතු කිරීමට චීනය සූදානම් බව ෂී ජින්පින් එම හමුවේදී ජෝ බයිඩ්න්ට ප්‍රකාශ කර ඇතැයි ද විදෙස් මාධ්‍ය වාර්තා කළේය.
