ශ්‍රී ලන්කන් ගුවන් සේවයෙන් භාවිතයෙන් ඉවත් කරන දෑ වෙනත් අරමුණු සඳහා යොදා ගැනීමේ මතක ව්‍යාපෘතිය එළිදැක්වීම පසුගිය දිනවල සිනමන් ලයිෆ් හිදී පැවැත්විණි.
ශ්‍රී ලන්කන් ගුවන් සේවය නිල ගුවන් සේවා සහකරු ලෙස කටයුතු කළ මේ වැඩසටහන 2021දී ආරම්භ විය. ශ්‍රී ලන්කන් ගුවන් සේවයේ ‘මතක’ සන්නාමය හඳුන්වා දෙන ලද්දේ එම ගුවන් සේවය විසින් භාවිත කර ඉවත් කරන ලද භාණ්ඩ යොදාගෙන, වෙනත් අරමුණු සඳහා භාවිතයට ගත හැකි ජීවන රටා සහ විලාසිතාමය නිෂ්පාදන එකතුවක් හඳුන්වාදීමේ අරමුණිනි.
මෙය දකුණු ආසියානු කලාපයේ වඩාත්ම තිරසර ගුවන් සේවය බවට පත්වීමට ශ්‍රී ලංකන් ගුවන් සේවය දරන උත්සාහයේ තවත් වැදගත් පියවරක් ලෙස හැඳින්විය හැකිවේ. මේ ව්‍යාපෘතියට ගුවන් සේවයෙන් ඉවත් කරන තවත් භාණ්ඩ වර්ග කිහිපයක් ද එක් කෙරිණි. ලොව පුරා බොහෝ සමාගම්වලට මෙන්ම ශ්‍රී ලන්කන් ගුවන් සේවයට ද තමන් භාවිතයෙන් ඉවත් කරන දේවල් බැහැර කිරීමට ඇති හොඳම ක්‍රමවේදය කුමක්ද යන ගැටලුව මතුවී තිබිණි.
ගුවන් සේවයක් විසින් භාවිතයෙන් ඉවත් කරන භාණ්ඩ යනු ආසන ආවරණ, බ්ලැන්කට්, තිර රෙදි, නිල ඇඳුම් සහ භාණ්ඩ රඳවන දැවමය පැලට් ආදියයි. ශ්‍රී ලන්කන් ගුවන් සේවය විසින් ‘මතක’ ව්‍යාපෘතිය ආරම්භ කරන ලද්දේ මේ ගැටලුවට පිළියමක් වශයෙනි.
මෙමඟින් ගුවන්යානා තුළ භාවිත කර ඉවත දමන දේවල් අලුත්ම පාරිභෝගික භාණ්ඩ බවට පරිවර්තනය කරයි. ඒ අනුව‘මතක’ ව්‍යාපෘතිය යනු පරිසර හිතකාමීත්වය සම්බන්ධයෙන් ශ්‍රී ලන්කන් ගුවන් සේවය සතු දැක්ම නව මානයකට රැගෙන යමින් ගුවන් මගීන්ගේ මතකවල ශේෂයන් සුවිශේෂී නිෂ්පාදන බවට පත්කරන පුරෝගාමී ව්‍යාපෘතියක් ලෙස හැඳින්විය හැකිය.
නවතම ‘මතක’ නිපැයුම් එකතුවට ට්‍රැවල්බෑග්, ටෝට් බෑග්,‘පෙග්ඩෝල්’ වර්ගයේ බෝනික්කන්, ටේබල්රනර් සහ ටේබල්මැට් ඇතුළු නිෂ්පාදන රාශියක් ඇතුළත් වේ. එමෙන්ම මෙහි තවත් විශේෂත්වයක් වන්නේ ශ්‍රී ලන්කන් ගුවන් සේවය සිය ‘මතක’ ව්‍යාපෘතිය වෙනුවෙන් ප්‍රථමවරට තිරසරත්ව ව්‍යවසායිකාවන් තිදෙනකු සමඟ අත්වැල් බැඳගැනීමයි.
ලොනාලි රුද්‍රිගු (House of Lonali), රූත් වීරසිංහ (SO4) සහ ශාමින් අබිඩීන්ගේ(Pom’s Island) යන ව්‍යවසායිකාවන් සමඟ ශ්‍රී ලන්කන් ගුවන් සේවය මෙලෙස අත්වැල් බැඳගෙන සිටී. මීට අමතරව ‘මතක’ ව්‍යාපෘතිය, ආර්ථික වශයෙන් දුෂ්කරතාවලට මුහුණදී සිටින කාන්තාවන් පිරිසකට ප්‍රතිලාභ සලසන වැඩසටහනක් බවට ද පත්වී ඇත. ‘මතක’ එකතුව අතරින් ඇතැම් නිපැයුම් නිපදවන්නේ එබඳු කාන්තාවන් විසින්වීම ඊට හේතුවයි.
මේ පිළිබඳව අදහස් දැක්වූ ශ්‍රී ලන්කන් ගුවන් සේවයේ ප්‍රධාන විධායක නිලධාරි රිචර්ඩ් නටාල් මහතා මෙලෙස කීවේය.
“අතීතයේ පටන්ම ශ්‍රී ලන්කන් ගුවන් සේවය පරිසරයේ යහපත වෙනුවෙන් කැපවී කටයුතු කර තිබෙනවා. එහි නවතම පියවර වන ‘මතක’ එකතුව නිර්මාණය කිරීමට අප මෙන්ම තිරසරත්වය වෙනුවෙන් කැපවී සිටින මේ විශිෂ්ට ව්‍යවසායිකාවන් සමඟ අත්වැල් බැඳගැනීමට හැකිවීම මහත් සතුටක්. ‘Sri Lanka Design Festival’ හිදී ‘මතක’ එකතුව පිළිබඳව උනන්දු වූ සියලුම දෙනාට අපගේ ස්තුතිය හිමි වෙනවා. මෙවැනි පරිසර හිතකාමී වැඩසටහන් අඛණ්ඩව ක්‍රියාවට නැංවීමට අපට හැකිවී ඇත්තේ ඔවුන්ගේ ඒ උනන්දුව නිසයි. මේ නිෂ්පාදන එකතුව ඉක්මනින් වෙළෙඳපොළට හඳුන්වාදීමට අප බලාපොරොත්තු වෙනවා.”
ශ්‍රී ලන්කන් ගුවන් සේවයේ අලෙවිකරණ, පාරිසරික කටයුතු හා තිරසරත්ව ප්‍රධානී සමින්ද පෙරේරා
“වර්තමාන ලෝකයේ වැඩි වැඩියෙන් තිරසර ක්‍රමවේද වෙත යොමුවීම අත්‍යවශ්‍යයි. මෙවැනි පසුබිමක් තුළ ‘මතක’ ව්‍යාපෘතියේ මීළඟ අදියර හඳුන්වාදීමට හැකිවීම මහත් සතුටක්. අපගේ තිරසර ඉලක්ක සමඟ මැනවින් සමගාමී වන මේ ව්‍යාපෘතිය නවෝත්පාදනය, කාන්තා ව්‍යවසායකත්වය සහ ප්‍රජාව මූලික කර ගත් ව්‍යාපාර ඔස්සේ සමාජයේ යහපත වෙනුවෙන් අර්ථවත් දායකත්වයක් දීමට සුවිශේෂී අවස්ථාවක් උදා කර දෙනවා. එමෙන්ම තිරසරත්වය යනු පොදු වගකීමක්. සමාගම් වශයෙන් මෙන්ම ගෝලීය පුරවැසියන් වශයෙන් සැවොම එම වගකීමට සාඩම්බරයෙන් උරදිය යුතු බව අපට සිහිපත් කරවනවා.”
Sri Lanka Design Festival හිදී ‘මතක’ නිපැයුම් එකතුවට අමතරව ශ්‍රී ලන්කන් ගුවන් සේවය විසින් තවත් තිරසරත්ව වැඩසටහන් කිහිපයක් ද ඉදිරිපත් කරන ලදි. මෙහිදී ශ්‍රී ලන්කන් ගුවන් සේවය විසින් පැලට් දැව ප්‍රතිචක්‍රීයකරණය කිරීම සහ එම දැව භාවිතයෙන් වෙනත් නිෂ්පාදන නිපදවීම සම්බන්ධ වැඩමුළුවක් ද සංවිධාන කර තිබූ අතර, එය මෙහෙයවන ලද්දේ Pom’s Island හි නිර්මාතෘ ශාමින් අබිඩීන් විසිනි.
