වතු කම්කරුවන්ගෙන් වෘත්තීය සමිති සඳහා මාසිකව අය කරනු ලබන සාමාජික මුදල් 2024 දෙසැම්බර් මස සිට අය නොකරන ලෙසට වතු වෘත්තීය සමිති කිහිපයක සාමාජිකයන් විසින් වතු පාලන අධිකාරියෙන් ඉල්ලීමක් කර ඇත.
මහමැතිවරණයෙන් අන්ත පරාජයක් ලැබූ වතුකරයේ වෘත්තීය නායකයන් බලයේ රැඳී සිටි කාලයේදීත් තමන්ට කිසිදු සුබසාධනයක් සිදු නොකළ බවත් ඒ අනුව මාසිකව රු. 250 – 330 දක්වා විවිධ ගණන් යටතේ එක් එක් වෘත්තීය සමිතිවලට අය කරන සාමාජික මුදල නතර කරන ලෙසට වතු කම්කරුවන් වතු පාලන අධිකාරියෙන් ඉල්ලා තිබේ. මාස හයකට වරක් වතු වෘත්තීය සමිති විසින් වතු කම්කරුවන් සාමාජිකයන් ලෙස බඳවා ගන්නා බවත් 2025 වසරේ මුල් මාස හය සඳහා සාමාජිකයන් බඳවා ගැනීම සඳහා එම වෘත්තීය සමිති විසින් ලබාදෙන අයදුම්පත් ලබා නොගැනීමට වතුකම්කරුවන් විශාල පිරිසක් මේ වන විට තීරණය කර ඇත. වතු කම්කරුවන් මාසිකව වෘත්තිය සමිති වෙත ගෙවනු ලබන සාමාජික මුදල්වල සවිස්තර වාර්තාවක් ද එම වෘත්තීය සමිති මඟින් තමන් වෙත ලබා නොදෙන බව වතු කම්කරුවෝ පවසති.
