ජනතාව බලාපොරොත්තු වූ සමාජ වෙනස ඇති කිරීම සඳහා සේවා සම්පාදනයේදී ප්‍රතිපත්ති සම්පාදකයන් සහ රාජ්‍ය සේවකයන් එක්ව කටයුතු කළ යුතුව ඇතැයි නාගරික සංවර්ධන නිවාස හා ඉදිකිරීම් ඇමැති ආචාර්ය අනුර කරුණාතිලක මහතා පැවසීය. ඒ මහතා මෙසේ පැවසුවේ එම අමාත්‍යාංශයේදී ඊයේ (19) ඇමැති ධුරයේ වැඩ භාර ගනිමිනි.
එහිදී වැඩිදුරටත් අදහස් දැක්වූ ඇමැතිවරයා මෙසේද පැවසීය.
“සේවා සම්පාදනයේදී ජනතාව වෙනුවෙන් අපට වගකීමක් තිබෙනවා. මෑත කාලයේදී දේශපාලනඥයන් ලෙස සිටින බොහෝ දෙනෙකුත් රජයේ සේවකයන් අතළොස්සකගේත් යම් යම් ක්‍රියාකලාප හේතුවෙන් මේ දෙගොල්ලන් සම්බන්ධයෙන්ම යහපත් ප්‍රතිරූපයක් ජනතාවට නැහැ. ඒ කලකිරීම ඇතුළු තවත් කරුණු ගණනාවක් නිසා ජනතාව වෙනසක් බලාපොරොත්තු වෙනවා. ඒ නිසා අපි දෙගොල්ලටම අලුත් අවකාශයක් ජනතාව විසින්ම උදාකර දී තිබෙනවා. සමාජය තුළ ආකල්පමය වෙනසක් ඇති කර, පොදු සමාජ පරිවර්තනයක් හරහා මිනිසුන්ගේ ජීවිතවල වෙනසක් ඇති කර ගැනීමට මේ අවස්ථාව ලැබිලා තියෙන්නේ.
මේ අවස්ථාව නිවැරදිව ග්‍රහණය කර ගනිමින්, ජනතාව බලාපොරොත්තු වූ වෙනස අත්පත් කරගන්නවද, එහෙම නැත්නම් පුරුදු පාරෙම යනවද කියන එක අපිට තීරණය කරන්න වෙනවා. අපි පුරුදු පාර තෝරගත්තොත් මිනිස්සුන්ගේ බලාපොරොත්තු කඩ කළ, අසමත් මිනිස්සු ලෙස ඉතිහාසයට එකතු වෙන්න අපට සිද්ධ වෙනවා. ජනතාව අපට සකස් කර දුන් අලුත් අවකාශය තෝරාගත්තොත් මිනිස්සුන්ගේ බලාපොරොත්තු ඉටු කරන්න පුළුවන්. කවදා හෝ දවසක අපේ ජීවිත දෙස නැවත හැරිලා බැලුවොත් මිනිස්සුන්ගේ බලාපොරොත්තු වෙනුවෙන් යමක් කළ අය ලෙස අපේ ජීවිත ගැන සතුටු විය හැකියි.”
