සර්වජන බලය පක්ෂයේ මහනුවර දිස්ත්‍රික් අපේක්ෂකයකු නිහඬ කාල සීමාවේ දී ඡන්ද දායකයන්ට බෙදා දීමට සූදානම් කර තිබූ බවට සැක කෙරෙන පොත් පාර්සල් තොගයක් ගලහ ගොවිජන සේවා මධ්‍යස්ථානයේ ගබඩා කාමරයක සඟවා තිබිය දී ගලහ පොලිසියේ නිලධාරීන් කණ්ඩායමක් ඊයේ (13) සොයා ගනු ලැබ තිබේ. මෙම පොත්වලින් කොටසක් ගලහ, දෙල්තොට ප්‍රදේශයේ වතු ආශ්‍රිතව පෙරේදා (12) දිනයේ දී බෙදා දී තිබෙන බවට ද ට්‍රාන්ස් පේරන්සි ආයතනයට තොරතුරු ලැබී ඇත. එම ආයතනය සහ ප්‍රදේශයේ ජාතික ජන බලවේගයේ පිරිසක් ගලහ පොලිසියට හා මැතිවරණ නිලධාරීන්ට කරන ලද දැනුම් දීමකට අනුව පොලිස් නිලධාරීන් කණ්ඩායමක් ඊයේ (13) එහි ගොස් ගොවිජන සේවා මධ්‍යස්ථානයේ ගබඩාව පරීක්ෂා කර තිබේ.
එම අවස්ථාවේ ගබඩාවේ තිබී පොත් පාර්සල් කට්ටල 17ක් සොයා ගත් බව පොලිසිය පවසයි.
මේ සම්බන්ධයෙන් කළ විමසිමක දී ගලහ ගොවිජන සේවා මධ්‍යස්ථානයේ ප්‍රාදේශීය නිලධාරිනිය පැවසුවේ පෙරේදා (12) පස්වරු 4.30 න් පසු කාලය තුළ මෙම පොත් කවුරුන් හෝ ගබඩා කාමරයට ගෙනවිත් දමන්නට ඇති බවයි. ඒ සම්බන්ධයෙන් තමන් පරීක්ෂණයක් කරන බව ද ඇය කීවාය. ගොවිජන සේවා මධ්‍යස්ථානයේ මුරකරුවකු ද සේවයේ යොදවා සිටින බව ප්‍රදේශවාසිහූ පැවසූහ.
