ජාත්‍යන්තර ක්‍රිකට් කවුන්සිලය නිකුත් කළ නවතම ශ්‍රේණිගත කිරීම් අනුව විස්සයි20 පන්දු යවන්නන් අතර දෙවැනි ස්ථානය දක්වා ඉදිරියට පැමිණීමට ශ්‍රී ලංකා දඟ පන්දු යවන ක්‍රීඩක වනිඳු හසරංග සමත් වෙයි.
නවසීලන්තයට එරෙහිව දඹුල්ලේදී නිමා වූ තරග දෙකකින් සමන්විත විස්සයි20 තරගාවලියේදී දැක්වූ දස්කම් මත වනිඳු ස්ථාන 4ක් ඉදිරියට ඒමට සමත්ව තිබේ. ලකුණු 37කට කඩුලු 6ක් බිඳ දමමින් ඔහු තරගාවලියේ වැඩිම කඩුලුලාභියා බවට ද පත් විය.
එම තරගාවලියේදී කඩුලු 5ක් දවාගත් වේග පන්දු යවන මතීෂ පතිරණ සහ කඩුලු 4ක් බිඳ දැමූ වේග පන්දු යවන නුවන් තුෂාර කැපී පෙනෙන අයුරින් ඉදිරියට පැමිණ සිටිති. මතීෂ ස්ථාන 22කින් ඉහළට එමින් 31 වැනි ස්ථානයේත්, තුෂාර ස්ථාන 28කින් ඉදිරියට ගොස් 48 වැනි ස්ථානයත් හිමිකර ගෙන සිටිති. එක් ස්ථානයකින් පහත බැස ඇති දඟ පන්දු යවන මහීෂ් තීක්ෂණ සිව්වැනි ස්ථානයේ සිටින අතර, එහි පළමු ස්ථාන එංගලන්තයේ අදිල් රෂීඩ්ට සහ තෙවැනි ස්ථානය කොදෙව් ක්‍රීඩක අකීල් හොසෙයින්ට හිමිව ඇත.
කෙසේ වෙතත් විස්සයි20 පිතිකරුවන් අතර ශ්‍රී ලාංකික ක්‍රීඩකයන්ගේ කැපී පෙනෙන වෙනසක් සිදුව නැති අතර, පැතුම් නිශ්ශංක 8 වැනි තැන රැඳී සිටියදී කුසල් මෙන්ඩිස් (15) ස්ථාන 3කින් පහත වැටී තිබේ. නායක චරිත් අසලංක (37) ස්ථාන 2ක්, කුසල් ජනිත් පෙරේරා (41) එක් ස්ථානයක් ඉහළට ගොස් තිබේ.
මේ අතර පාකිස්තාන වේග පන්දු යවන ක්‍රීඩක සහීන් ෂා අෆ්රිඩි ඔස්ට්‍රේලියාවට එරෙහිව පැවති එක්දින තරගාවලියේදී දැක්වූ දස්කම් මත පන්දු යවන්නන් ශ්‍රේණිගත කිරීම්වල පළමු ස්ථානයට පත්වීමට සමත්ව ඇත. පසුගිය වසරේත් පෙරමුණ හිමි කර ගැනීමට සමත්වූ ඔහු මෙවර ස්ථාන 3ක් ඉදිරියට එමින් පෙරමුණ ගනිද්දී පළමු ස්ථානයේ සිටි දකුණු කේෂව් මහරාජ් තෙවැනි ස්ථාන දක්වා පහත වැටී ඇති අතර, දෙවැනි ස්ථානය ඇෆ්ගනිස්තානයේ රෂීඩ් ඛාන්ට හිමිව ඇත.
ශ්‍රී ලංකාවේ මහීෂ් තීක්ෂණ 12 වැනි තැනම රැඳී සිටියදී වනිඳු හසරංග (18) එක් ස්ථානයක් පහත බැස තිබේ. පිතිකරුවන් අතර පෙරමුණ ද පාකිස්තානයට හිමිව ඇති අතර, බාබර් අසාම් එහි පළමු ස්ථානයේ සිටී.
