පිතිකරුවන් 5 දෙනකු රැස් කළ අර්ධ ශතක හේතුවෙන් පාකිස්තාන සහීන්ස් කණ්ඩායම සමඟ පැවැත්වෙන පළමු නිල නොවන සිව්දින ටෙස්ට් තරගයේදී ලකුණු 221කින් පෙරට පැමිණීමට සංචාරක ශ්‍රී ලංකා ‘ඒ’ කණ්ඩායම සමත් විය.
රාවල්පින්ඩිහිදී පැවැත්වෙන මේ තරගය ඊයේ තෙවැනි දිනයට නතර කරන විට ශ්‍රී ලංකා ‘ඒ’ පිල දෙවැනි ඉනිම වෙනුවෙන් ලකුණු 364ක් රැස් කර තිබුණේ කඩුලු 9ක් දැවී තිබියදීය.
සොනාල් දිනූෂ නොදැවී ලකුණු 62ක් රැස් කර සිටියේ හතරේ පහර 6ක් සමඟ පන්දු 125කිනි.
මේ ඉනිමේදී නායක පසිඳු සූරියබණ්ඩාර (64), අහන් වික්‍රමසිංහ (53), පවන් රත්නායක (60), වනුජ සහන් (73) සහ සොනාල් දිනූෂ (නොදැවී 62) අර්ධ ශතක රැස් කළහ. පෙරේදා තරගය නතර කරන විට දෙවැනි කඩුල්ලට ලකුණු 76ක සබඳතාවක් ගොඩනඟා සිටි නිපුන් ධනංජය සහ අහන් වික්‍රමසිංහ තවත් ලකුණු 10ක් එක් කරගත් අතර, නිපුන් ලකුණු 28ක් ලබා සිටියදී දැවී යෑමෙන් එම සබඳතාව නිමා විය.
නායක පසිඳු සූරියබණ්ඩාර සහ පවන් රත්නායක සිව්වැනි කඩුල්ලට පන්දු 142කින් ලකුණු 126ක සබඳතාවක් ගොඩනඟමින් පාකිස්තාන පළමු ඉනිම අබිබවා ශ්‍රී ලංකා ඉනිම ඉදිරියට ගෙන ගියහ. මුළු ලකුණු 213දී එම සබඳතාව බිඳ වැටුණේ පවන් ලකුණු 60කට දැවී යෑමෙනි. කෙසේ වෙතත් ලකුණු 7ක් තුළ තවත් කඩුලු 3ක් බිඳ වැටීමෙන් ඉනිම ලකුණු 226කට කඩුලු 7ක් විය. 8 වැනි කඩුල්ලට එක් වූ සොනාල් දිනූෂ සහ වනුජ සහන් ලකුණු 130 සබඳතාවක් ගොඩනඟමින් ඉනිම ලකුණු 350 සීමාවෙන් එපිටට රැගෙන ගියහ. පන්දු 99කදී හතරේ පහර 7ක් සහ හයේ පහරක් සමඟ ලකුණු 73ක් රැස් කළ වනුජ දැවී යෑමෙන් එම සබඳතාව අවසන් විය. අද තරගයේ අවසන් දිනයයි.
ශ්‍රී ලංකා ‘ඒ’ පළමු ඉනිම – 115 (ඕවර 33.1) සොනාල් දිනූෂ 30 (කාෂිෆ් අලි 31/5, කුරාම් ශෙහ්සාඩ් 32/4)
පාකිස්තාන සහීන්ස් පළමු ඉනිම – 258 (ඕවර 82.1) හුසේන් තලාත් 56, අලි සර්යුබ් 55, රොහයිල් නසීර් 55 (විශ්ව ප්‍රනාන්දු 44/4, ඉසිත විජේසුන්දර 49/2, නිසල තාරක 57/2)
ශ්‍රී ලංකා ‘ඒ’ දෙවැනි ඉනිම – 364/9 (ඕවර 96) වනුජ සහන් 73, පසිඳු සූරියබණ්ඩාර 64, පවන් රත්නායක 60, අහන් වික්‍රමසිංහ 53, සොනාල් දිනූෂ නොදැවී 62 (කුරාම් ශෙහ්සාඩ් 70/4, මොහොමඩ් සුලෙමන් 21/2, කාෂිෆ් අලි 79/2)
