පාර්ලිමේන්තුවට පත් කර යැවිය යුත්තේ පාර්ලිමේන්තුව ශුද්ධ කරන පිරිසක් නොව පාර්ලිමේන්තුව රැක ගන්නා කණ්ඩායමක් යැයි හිටපු ජනාධිපති රනිල් වික්‍රමසිංහ මහතා පැවසීය.
හිටපු ජනාධිපති රනිල් වික්‍රමසිංහ මහතා එසේ පැවසුවේ පසුගියදා (06) රාත්‍රියේ සියඹලාපේවත්ත, ටැමරින් උත්සව ශාලාවේ පැවති නව ප්‍රජාතන්ත්‍රවාදී පෙරමුණේ බියගම ජනහමුව අමතමිනි.
නව ප්‍රජාතන්ත්‍රවාදී පෙරමුණේ ගම්පහ දිස්ත්‍රික් අපේක්ෂකයන් වන බියගම ආසනයෙන් ඉදිරිපත් වී සිටින එක්සත් ජාතික පක්ෂයේ නියෝජ්‍ය නායක රුවන් විජයවර්ධන හා හිටපු බස්නාහිර පළාත් සභා මන්ත්‍රී ගුණසිරි ජයනාත් මහත්වරුන් විසින් මෙය සංවිධානය කර තිබිණි.
මෙහිදී තවදුරටත් රනිල් වික්‍රමසිංහ මහතා මෙසේ ද කීය.
“පාර්ලිමේන්තුව කියන්නේ රටේ උත්තරීතර ආයතනයක්. රටට අවශ්‍ය නීති සම්පාදනය කරනවා. රට ඉදිරියට ගෙනයෑමට අවශ්‍ය අණපනත් සම්මත කරන්නේත් රටේ මුදල් පාලනය කරන්නේත් පාර්ලිමේන්තුව. එවැනි උත්තරීතර ආයතනයක් ශුද්ධ කරනවා කියන්නේ බරපතළ ප්‍රශ්නයක්. ඉතින් එහෙම කියන ජාතික ජන බලවේගයෙන් පාර්ලිමේන්තුව ගැන විශ්වාසයක් තබන්නට අපට බැහැ. ඒ නිසා එවැනි පක්ෂයක අපේක්ෂකයන් පාර්ලිමේන්තුවට යවන්න එපා.
ඔවුන් පාර්ලිමේන්තුවට හොර ගුහාවක් කියනවා. එය හොර ගුහාවක් නම් ජාතික ජන බලවේගය පාර්ලිමේන්තුවට එන්න හදන්නේ ඇයි. රටේ ප්‍රජාතන්ත්‍රවාදය ආරක්ෂා කරන්නේ පාර්ලිමේන්තුවයි. ඒ නිසා ඔවුන් පාර්ලිමේන්තුවට ආවොත් එය මේ රටේ ප්‍රජාතන්ත්‍රවාදයට තර්ජනයක් එල්ල වීමට පවා ඉඩ තිබෙනවා. ඔවුන්ගේ අතීතය දෙස ආපසු හැරී බැලුවොත් එය අපට මනාව පැහැදිලියි. ඒ නිසා මේ රටේ ප්‍රජාතන්ත්‍රවාදය ආරක්ෂා කිරීමට කැපවී සිටින නව ප්‍රජාතන්ත්‍රවාදී පෙරමුණට පාර්ලිමේන්තුවේ බහුතරය දෙන ලෙස ජනතාවගෙන් ඉල්ලනවා.
අපගේ පෙරමුණේ රටට වැඩ කර පළපුරුද්දක් තිබෙන මැති ඇමැතිවරුන් සිටිනවා. එහෙම අය පාර්ලිමේන්තුවට යවන්න. පළපුරුද්දක් නැති අය පාර්ලිමේන්තුවට යවන්න එපා. ඒ අය පාර්ලිමේන්තුවට පත්වුවහොත් රට ඉදිරියට ගෙන යන්න බැහැ. මේ රට වැටී තිබෙන අමාරු කාලයේ තමයි මා රට භාර ගත්තේ. ඒ අවස්ථාවේ මට එවකට පාර්ලිමේන්තුවේ සිටි අය සහාය දුන්නා. ඒකයි මට වැටී තිබූ රට වසර දෙකක් වැනි කෙටි කාලයකින් ගොඩගෙන රටේ ආර්ථිකය ශක්තිමත් කිරීමට හැකිවුණේ. ජාතික ජන බලවේගයේ රට නැංවීමට පළපුරුද්දක් හා හැකියාවක් තිබෙන අය නැහැ.
මේ ඡන්දය පාර්ලිමේන්තුව ශුද්ධ කරන ඡන්දයක් නොවෙයි. පාර්ලිමේන්තුව බේරාගන්නා ඡන්දයක්. ඒ නිසා මේ මැතිවරණයේදී ජනතාව බුද්ධිමත්ව ඡන්දය පාවිච්චි කරන්න ඕනෑ. පාර්ලිමේන්තුව හොරු ගුහාවක් කියන, පාර්ලිමේන්තුව ශුද්ධ කරනවා කියන ජාතික ජන බලවේගයේ අය පාර්ලිමේන්තුවට පත්වුවහොත් ඔවුන් රටේ ගෙනියන්න හදන්නේ පැසිස්ට්වාදී පාලනයක් බව අපට පැහැදිලියි. ඒ බව ඔවුන්ගේ කියුම්වලින් පෙනී යනවා. ඒ නිසා මේ රටට ආදරය කරන ජනතාව මේ රටේ පාර්ලිමේන්තුව බේරා ගන්න ඉදිරිපත් වී සිටින නව ප්‍රජාතන්ත්‍රවාදි පෙරමුණේ අය පාර්ලිමේන්තුවට යැවිය යුතුයි. රට රැකෙන්නේ පාර්ලිමේන්තුව පැවතුණොත් පමණයි.”
නව ප්‍රජාතන්ත්‍රවාදි පෙරමුණේ ගම්පහ දිස්ත්‍රික් අපේක්ෂක හා එක්සත් ජාතික පක්ෂයේ නියෝජ්‍ය නායක රුවන් විජයවර්ධන මහතා –
“ජනාධිපතිවරණයේදී ජාතික ජන බලවේගයට ඡන්දය දුන් අය මේ මැතිවරණයේදී ඔවුන්ට ඡන්දය දෙන්නේ නැහැ. ඒ හේතුවෙන් ඔවුන්ගේ ඡන්ද ප්‍රමාණය මෙවර අඩු වෙනවා. ඒ නිසා ඔවුන් මේ වනවිට ජනතාවට දුන් පොරොන්දු ඉටු කිරීමට නොහැකිව දැඩි අර්බුදයකට මුහුණ පා සිටිනවා.”
නව ප්‍රජාතන්ත්‍රවාදි පෙරමුණේ ගම්පහ දිස්ත්‍රික් අපේක්ෂක හිටපු බස්නාහිර පළාත් සභා මන්ත්‍රී ගුණසිරි ජයනාත් මහතා –
“අයිඑම්එෆ් ගිවිසුම අහෝසි කරන බව කී අනුර කුමාර දිසානායක ජනාධිපතිවරයාට එය වෙනස් කරන්න නොහැකි වී තිබෙනවා. එයින්ම ඔහුට රටේ ආර්ථිකය ශක්තිමත් කිරීමට වෙන විකල්පයක් නැති බව මනාව පැහැදිලියි.”
නව ප්‍රජාතන්ත්‍රවාදි පෙරමුණේ ගම්පහ දිස්ත්‍රික් අපේක්ෂකයන් වන හිටපු රාජ්‍ය ඇමැති ලසන්ත අලගියවන්න හා හිටපු පාර්ලිමේන්තු මන්ත්‍රීනි කෝකිලා හර්ෂණී ගුණවර්ධන, හිටපු ඇමැතිනි තලතා අතුකෝරල හා බියගම ප්‍රාදේශීය සභාවේ හිටපු විපක්ෂ නායක ප්‍රසන්න සම්පත් යන මහත්ම මහත්මීහු ද මෙහිදී කතා කළහ.
නව ප්‍රජාතන්ත්‍රවාදී පෙරමුණේ අපේක්ෂකයන් වන දොම්පේ ආසනයේ ප්‍රධාන සංවිධායක සුජිත් ප්‍රියදර්ශන, ප්‍රියාන් ඩී. සිල්වා හා හිටපු පාර්ලිමේන්තු මන්ත්‍රී අංශු මාරසිංහ මහත්වරු ද මේ අවස්ථාවට සහභාගි වූහ.
