ඇෆ්ගනිස්ථානයේ සුපිරි තුන් ඉරියව් ක්‍රීඩක මොහොමඩ් නබි එළඹෙන චැම්පියන්ස් කුසලාන ක්‍රිකට් තරගාවලියෙන් පසු එක්දින ක්‍රිකට් පිටියෙන් සමුගැනීමට තීරණය කරයි. නබි ඔහුගේ තීරණය ඇෆ්ගනිස්ථාන ක්‍රිකට් පාලක මණ්ඩලයට දන්වා ඇත. 39 හැවිරිදි මොහොමඩ් නබි 2019 වසරේ ටෙස්ට් ක්‍රිකට් පිටියෙන් සමුගත්තේය. එහෙත් තවමත් ඔහු ඇෆ්ගනිස්තානය විස්සයි20 ක්‍රිකට් පිල නියෝජනය කරමින් සිටී. ඇෆ්ගනිස්ථාන ක්‍රිකට් පාලක මණ්ඩලයේ ප්‍රධාන විධායක නිලධාරී නසීබ් ඛාන් මේ බව විදෙස් මාධ්‍ය වෙත තහවුරු කළේය. නසීබ් ඛාන් පැවසුවේ, චැම්පියන්ස් කුසලානයෙන් පසු නබී එක්දින ක්‍රිකට් ක්‍රීඩාවෙන් විශ්‍රාම ගන්නා අතර ඔහු තම කැමැත්ත මණ්ඩලයට දන්වා ඇත. ඔහු මාස කිහිපයකට පෙර මට පැවසුවේ චැම්පියන්ස් කුසලානයෙන් පසු ඔහුගේ එක්දින ක්‍රිකට් දිවිය අවසන් කිරීමට අවශ්‍ය බවත් ඔහුගේ තීරණය අපි සාදරයෙන් පිළිගන්නා බවත්ය. චැම්පියන්ස් කුසලානයෙන් පසුව මොහොමඩ් නබි විස්සයි20 ක්‍රිකට් දිවිය දිගටම කරගෙන යනු ඇතැයි අපේක්ෂා කරයි.
