රජයේ දේපොළ අවභාවිත කිරීම, රජයේ දේපොළ සැඟවීම හෝ පැහැර ගැනීම් සම්බන්ධයෙන් වූ තොරතුරු 1997 අංකය ඔස්සේ පොලිසියට දැනුම්දීමට මහජනතාවට හැකියාව ඇති බව පොලිස් මූලස්ථානය සඳහන් කරයි.
මෙම දුරකතන අංකය පසුගිය කාලයේ ක්‍රියාත්මක වූයේ යුක්තිය මෙහෙයුමට අදාළව මත්ද්‍රව්‍ය ජාවාරම සම්බන්ධයෙන් මහජන තොරතුරු ලබා ගැනීමටය. යුක්තිය මෙහෙයුම පොලිසියේ ඉහළ නිලධාරීන් කිහිප දෙනෙකු දේශපාලන වූවමනාවකට අනුව සිදුකළ නාඩගමක් බව පෙනී ගිය බැවින් වැඩ බලන පොලිස්පතිවරයා පත්වීමත් සමඟ ඊට නැවතීමේ තිත තැබිණි. ඒ වෙනුවට පොලිස් ස්ථාන මට්ටමින් ස්ථානාධිපතිවරු මෙන්ම පොලිස් අධිකාරීවරු සහ නියෝජ්‍ය පොලිස්පතිවරුන්ට ඒ සම්බන්ධයෙන් වගකීම් පවරනු ලැබීය.
එසේ යුක්තියට නැවතීමේ තිත තබා මාසයක කාලයක් ගෙවී යන විට යුක්තිය මෙහයුමෙන් සිදුකළ වැටලීම්වලින් සොයාගත් ප්‍රමාණයට වඩා විශාල වශයෙන් මත්කුඩු මෙන්ම ගිනි අවි ද සොයා ගෙන අපරාධ විසඳීමේ ප්‍රතිශතයද ඉහළ ගොස් ඇති බව පොලිස් මූලස්ථාන තොරතුරු සඳහන් කළේය.
මේ තත්ත්වය සැළකිල්ලට ගෙන වැඩ බලන පොලිස්පතිවරයා පොලිස් නිලධාරීන් සිදු කරනු ලබන වංචා, අල්ලස් ගැනීම් නිසි ලෙස පැමිණිලි විභාග නොකිරීම් ආදී දූෂණ අක්‍රමිකතා මෙන්ම විෂමාචාර ක්‍රියා සම්බන්ධයෙන් මහජනතාවට තොරතුරු ලබා දීමට ද 1997 කෙටි දුරකතන අංකය වෙන් කරනු ලැබීය.
ආරුගම්බේ ආශ්‍රීතව ඊශ්‍රායල් ජාතිකයන් ඉලක්කර ගෙන ප්‍රහාරයක් ඒල්ල කිරීමේ සූදානමක් ඇති බවට වූ තොරතුරක් සමඟ මෙම දුරකතන අංකයට මෙරට සංචාරයන්වල නිරත වන විදේශිකයන්ට සිදුවන කරදර හා හිරිහැර සම්බන්ධයෙන් මෙන්ම ඔවුන්ගේ ආරක්ෂාවට අදාළ තොරතුරු මහජනතාවගෙන් මෙන්ම විදේශිකයන්ගෙන් ලබා ගැනීමට ද මෙම 1997 දුරකතන අංකය විවෘත කරනු ලැබීය.
මෙම දුරකතන අංකයෙන් ලබාදෙන සේවාව තවදුරටත් පුළුල් කිරීම තුළින් දැන් මෙම දුකරතන අංකයට රජයේ වාහන හා දේපොළ අවභාවිත කිරීම් සම්බන්ධයෙන් තොරුතරු ලබාදිය හැකි බව පොලිස් මූලස්ථානය සඳහන් කරයි.
මෙම දුරකතන අංකය මුලින්ම ශ්‍රී ලංකා පොලිසිය යටතේ ස්ථාපිත කර ඇත්තේ 2020 වසරේ ජූලි 29 වැනිදා විෂ මත්ද්‍රව්‍ය මහා පරිමාණ දූෂණ ක්‍රියා, ජාතික ආරක්ෂාවට තර්ජනයක් විය හැකි සංවිධානාත්මක අපරධ කල්ලි ක්‍රියාකාරකම් සම්බන්ධයෙන් මහජනතාවට තොරතුරු ලබාදීමට බව පොලිස් මාධ්‍ය කොට්ඨාසය සඳහන් කරයි.
පරිසර වැරදි ගැන තොරතුරු ලබාදීමටත් විශ්වවිද්‍යාල හා උසස් අධ්‍යාපන ආයතනතුළ සිදුවන නවක වදය සම්බන්ධයෙන් තොරතුරු ලබාදීමටත් 2023 වසරේ සැත්තැම්බර් 12 වැනිදා මෙම අංකය මහජනතාවට හඳුන්වා දුන් බව ද පොලිස් මාධ්‍ය කොට්ඨාසය සඳහන් කරයි.
