ශ්‍රී ලංකාවට සංචාරක තහනමක් පනවා තිබෙන බවට පැතිර යන පුවත් සාවද්‍ය බව ශ්‍රී ලංකාවේ අමෙරිකානු තානාපතිනී ජුලී චන්ග් මහත්මිය ප්‍රකාශ කරයි. යම් ආරක්ෂක තර්ජනයක් සම්බන්ධයෙන් අමෙරිකානු තානාපති අංශ දැනගතහොත් එම තොරතුර සම්බන්ධයෙන් කාර්ය මණ්ඩලය, අමෙරිකානු පුරවැසියන් සහ අදාළ රජය දැනුම්වත් කිරීම කළ යුතු බව ද ඒ සම්බන්ධයෙන් දෙබිඩි ප්‍රතිපත්තියක් අනුගමනය නොකරන බව ද ඇය පවසයි. කොළඹ අමෙරිකානු මධ්‍යස්ථානයේ පැවති උත්සවයකින් අනතුරුව අදහස් දක්වමින් තානාපතිනිය මේ බව ප්‍රකාශකර ඇත.
ශ්‍රී ලංකාවට කාලයකට පෙර හඳුන්වාදී තිබූ සංචාරක උපදේශනයේ වෙනසක් සිදුකර නොමැති බව පෙන්වාදුන් තානාපතිනිය යම් ආරක්ෂක තර්ජනයක් සම්බන්ධයෙන් අමෙරිකානු තානාපති අංශ දැනගතහොත් එම තොරතුර සම්බන්ධයෙන් මෙලෙස දැනුම්වත් කිරීම ලොව පුරා රාජ්‍යතාන්ත්‍රික කටයුතුවල දී අමෙරිකාව භාවිත කරන පිළිගත් ක්‍රමවේදය බව ද සඳහන් කළාය.
අරුගම්බේ ප්‍රදේශයට ඇති තර්ජනය සම්බන්ධයෙන් දැනගත් පසු එම දැනගත් කරුණු ශ්‍රී ලංකා බලධාරීන්ට දැන්වූ බව පැවසූ ඒ මහත්මිය ඒ සඳහා ශ්‍රී ලංකා බලධාරීන් කඩිනම් ප්‍රතිචාර දැක්වූ බව ද සිය තානාපති කාර්යාලය මෙරට බලධාරින් සමඟ කාර්යශීලිව, දෛනිකව අදහස් හුවමාරු කරගන්නා බව ද කීවාය. එසේම ශ්‍රී ලංකාවේ නායකත්වය සහ ආරක්ෂක නිලධාරීන් සමඟ ඇති සහයෝගය අගය කරන බව සඳහන් කළ ඇය විනිවිදභාවයට ඔවුන්ගේ ඇති කැපවීම විශේෂ වන බව ද පැවසුවාය.
අමෙරිකානු තානාපති කාර්යාලය විසින් ඉකුත් සතියේදී ආරක්ෂක අනතුරු ඇඟවීම සිදු කළේ, අමෙරිකානු පුරවැසියන්ට නැවත දැනුම්දෙනතුරු ආරුගම්බේ ප්‍රදේශයේ සංචාරය කිරීම නතර කරන ලෙස පමණක් බව කී ශ්‍රී ලංකාවේ ඇමෙරිකානු තානාපතිනිය කෙසේ නමුත් ශ්‍රී ලංකාව වෙනුවෙන් නිකුත් කර තිබූ සංචාරක උපදේශනයේ කිසිදු වෙනසක් සිදුකර නොමැති බව ද කීවාය.
එය දෙවැනි මට්ටමේ (Level 2) උපදේශනයක් වන අතර එය බොහෝ වසර ගණනක් පැවතුණේ ඒ ආකාරයෙන් ම බවත් මාලදිවයින, ඉතාලිය සහ ප්‍රංශය වෙනුවෙන් නිකුත් කර ඇති සංචාරක උපදේශන හා සමාන වන බවත් ඒ මහත්මිය වැඩිදුරටත් කියා සිටියාය.
