බඩඉරිඟු ආනයනය කිරීමට රජය අවසර දීමත් සමඟ සත්ත්ව ආහාර මිල අඩුවීම නිසා ඉදිරියේදී බිත්තර මිල ඉහළ යෑමක් සිදු නොවන බව සත්ත්ව විද්‍යා හා සෞඛ්‍ය දෙපාර්තමේන්තුව පවසයි.
දෙපාර්තමේන්තුව සතු සංඛ්‍යා ලේඛන අනුව දෙසැම්බර් මාසය වන විට අතිරික්තයක් ඇතිවන තරමට බිත්තර නිෂ්පාදනයේ ඉහළ යෑමක් අපේක්ෂා කරන බවත් මේ නිසා ඉදිරියේදී බිත්තර හිඟයක් ඇති වෙතැයි අනියත බියක් ඇති කර ගැනීමේ අවශ්‍යතාවක් නොමැති බවත් සත්ත්ව නිෂ්පාදන හා සෞඛ්‍ය දෙපාර්තමේන්තුවේ අධ්‍යක්ෂ ජනරාල් ආචාර්ය හේමාලි කොතලාවල මහත්මිය පැවසුවාය.
බිත්තර නිෂ්පාදන මිල ඉහළ යෑමට 80-90 %ක් පමණ බලපාන්නේ සත්ත්ව ආහාර මිල ඉහළ යෑම බවත් බඩඉරිඟු මිල වැඩි වශයෙන් ඒ සඳහා බලපාන බවත් ඇය කීවාය. මේ වන විට බඩඉරිඟු ආනයනය සඳහා රජය අවසර ලබා දී තිබෙන බවත් ඒ අනුව සත්ත්ව ආහාර මිල අඩුවීමක් සිදුවන බවත් කී කොතලාවල මහත්මිය මෙම තත්ත්වය තුළ සත්ත්ව ආහාර මිල ඉහළ යෑමක් සිදුවීමට කිසිදු ඉඩක් නැතැයි ද අවධාරණය කළාය.
