නැඟෙනහිර පළාතේ පාසල්වලට අනුයුක්තව සේවය කරන සංවර්ධන නිලධාරින් රාජකාරි කටයුතුවලදී මුහුණ දෙන ගැටලු සම්බන්ධයෙන් විශේෂ සාකච්ඡාවක් ආණ්ඩුකාර මහාචාර්ය ජයන්ත ලාල් රත්නසේකර මහතා හා සංවර්ධන නිලධාරින් අතර ආණ්ඩුකාර කාර්යාලයේදී පැවැත්විණි.
පස්වරු දෙකට පාසල් අවසන් වීමෙන් පසු සවස හතරයි පහළොව දක්වා පාසලේ රැඳී සිටීම සංවර්ධන නිලධාරින් මුහුණ දී ඇති ප්‍රධාන ගැටලුව බව ආණ්ඩුකාරවරයාගේ අවධානයට යොමු කෙරිණි. සංවර්ධන නිලධාරින් ශ්‍රී ලංකා ගුරු සේවයට අනුයුක්ත කිරීම සඳහා ගෙන ඇති ක්‍රියාමාර්ග කඩිනම් කරන ලෙසද එම නිලධාරින් ආණ්ඩුකාරවරයාට අවධාරණය කළහ.
අදාළ ගැටලුවලට කඩිනමින් විසඳුම් ලබාදීමට ආණ්ඩුකාරවරයා මෙහිදී එකඟ වූ අතර, සංවර්ධන නිලධාරින් ගුරු සේවයට අන්තර්ග්‍රහණය කිරීම සඳහා පවතින නඩුව පිළිබඳව ආණ්ඩුකාරවරයා පැහැදිලි කළේය.
