අප්‍රිකානු සූකර උණ රෝගය (African swine fever) මෙරට ඇතුළු වී ඇත්තේ අවිධිමත් ලෙස ආනයනය කළ ඌරු මස්වලින් හෝ ගුවන්තොටුපොළ හා වරාය මඟින් ඉවතලන ආහාරවලින් බවට අනුමාන කරන්නේ යැයි සත්ත්ව නිෂ්පාදන හා සෞඛ්‍ය දෙපාර්තමේන්තුවේ අධ්‍යක්ෂ ජනරාල් ආචාර්ය හේමාලි කොතලාවල මහත්මිය පැවසුවාය.
කෙසේ වුවත් ඒ බව නිශ්චිතව තහවුරු කර ගැනීම සඳහා වසංගත විද්‍යාත්මක විමර්ශනයක් සිදු කරමින් සිටින බව ද ඇය පැවසුවාය. මහනුවර ගන්නෝරුවේ පිහිටි සත්ත්ව නිෂ්පාදන හා සෞඛ්‍ය දෙපාර්තමේන්තු කාර්යාලයේදී මාධ්‍ය හමුවේ අදහස් දක්වමින් කොතලාවල මහත්මිය මේ බව කීවාය.
මෙරටට අවශ්‍ය ඌරු මස්වලින් කුඩා ප්‍රමාණයක් විදේශ රටවලින් ආනයනය කරන බවත් එහිදී ආනයනික බලපත්‍ර ලබා දෙන්නේ සූකර උණ රෝගය නොමැති රටවලින් මස් ආනයනය කිරීමට බවත් ඇය පැවසුවාය.
මෙම තත්ත්වය තුළ විධිමත් ලෙස ආනයනය කළ ඌරු මස්වලින් මෙම වෛරසය රට තුළට ඇතුළු වීමට කිසිදු ඉඩක් නොමැති බවත් අවධිමත් ලෙස රටට ගෙන එනු ලැබූ මස් මඟින් හෝ ගුවන් තොටුපොළ හා වරායට පැමිණෙන නැව්වලින් ඉවතලන ආහාර මඟින් මෙය රට තුළට ඇතුළු වූ බවට අනුමාන කරන බවත් අධ්‍යක්ෂ ජනරාල්වරිය ප්‍රකාශ කළාය.
පරිභෝජනයෙන් පසු ඉවතලන ඉඳුල් ගොවිපොළවල ඇතිකරන ඌරන්ට ලබාදෙන බැවින් ඒ ඔස්සේ මෙම වෛරසය සතුන් කරා ගමන් කිරීමේ හැකියාවක් පවතින බව ද ඇය ප්‍රකාශ කළාය.
පසුගිය මාස එකහාමාරක කාලය තුළ මෙරට ඌරු ගොවිපොළ ආශ්‍රිතව ව්‍යාප්ත වූ රෝගය පී.ආර්.ආර්.එස් (Porcine Reproductive and Respiratory Syndrome) බවට පශු වෛද්‍ය පර්යේෂණ ආයතනය තහවුරු කළ බවත් එහි දී මතුවන රෝග ලක්ෂණවලට වඩා වෙනස් රෝග ලක්ෂණ පවතින සතුන් ද ගොවිපොළ කිහිපයකින් වාර්තා වීම නිසා පශු වෛද්‍ය පර්යේෂණ ආයතනය එම සතුන් ගේ සාම්පල කිහිපයක් පරීක්ෂා කිරීමේ දී ඒ අතරින් කිහිපදෙනකුට අප්‍රිකානු සූකර උණ වැලඳී තිබෙන බව තහවුරු වූ බවත් කොතලාවල මහත්මිය කීවාය.
මේ අනුව මෙරටින් මේ වනවිට පී.ආර්.ආර්.එස් (Porcine Reproductive and Respiratory Syndrome) රෝගය සහ අප්‍රිකානු සූකර උණ රෝගය උණ (African swine fever) යන වෛරස් රෝග දෙකම වාර්තා වී තිබෙන බවත් පී.ආර්.ආර්.එස් රෝගයට එන්නතක් ඇතත් අප්‍රිකානු සූකර උණට මෙතෙක් එන්නතක් සොයාගෙන නොමැති බවත් අධ්‍යක්ෂ ජනරාල්වරිය පැවැසුවාය. රෝග දෙකම වෛරස් රෝග වුවත් අප්‍රිකානු සූකර උණ අධිව්‍යාධිජනක වෛරස් රෝගයක් බව ද රෝගය පැතිර යාම වැළැක්වීම සඳහා ඌරන්, ඌරු මස් හා ආසාදිත වෙනයම් ද්‍රව්‍යයක් ප්‍රාදේශීය ලේකම් කොට්ඨාස අතර ප්‍රවාහනය මුළුමනින්ම තහනම් කරමින් ගැසට්ටුවක් එළිදැක් වූ බව ද ඇය කීවාය.
මේ වනවිට වෛරස් ආසාදිත සතුන් වාර්තා වී තිබෙන්නේ පළාත් හතරකින් පමණක් වුවත් රෝග ව්‍යාප්තිය පාලනය සඳහා ගත යුතු ක්‍රියාමාර්ග සම්බන්ධයෙන් සත්ත්ව නිෂ්පාදන හා සෞඛ්‍ය දෙපාර්තමේන්තුවේ සියලු පළාත් අධ්‍යක්ෂවරු දැනුවත් කළ බවත් කොතලාවල මහත්මිය ප්‍රකාශ කළාය.
මියගිය සතුන් මඟින් පරිසරයට මෙම ෙවෙරසය එකතුවීම අවම කිරීම සඳහා එම සතුන් පුලුස්සා දැමීම හෝ ගැඹුරු වළවල් කපා වළ දැමීම සුදුසු බවට උපදෙස් මාලාවක් නිකුත් කර ඇතැයි ද ඇය කීවාය.
