ශ්‍රී ලංකාවේ රාජ්‍ය බුද්ධි අංශයට කලින්ම නිවැරැදි තොරතුරු ලැබී තිබීමෙන් පාස්කු ඉරිදා ත්‍රස්ත ප්‍රහාරය ඉතා පැහැදිලිවම වළක්වාගත හැකිව තිබුණ ද නොසැලකිලිමත් ආකාරයට බුද්ධි අංශය කටයුතු කිරීම හේතුවෙන් එම ම්ලේච්ඡ ප්‍රහාරය සිදුවූ බව ජ්‍යෙෂ්ඨ මාධ්‍යවේදී සුනන්ද දේශප්‍රිය මහතා ඉබ්බාගමුවේදී ප්‍රකාශ කළේය.
සුනන්ද දේශප්‍රිය මහතා පාස්කු ඉරිදා ත්‍රස්ත ප්‍රහාරය සම්බන්ධයෙන් ලියන ලද “පාස්කු ප්‍රහාරය, පාර රාජ්‍යය සහ නොවිසඳුණු අබිරහස්” නමැති කෘතිය පිළිබඳ කුරුණෑගල ඉබ්බාගමුව දේවසරණ කේන්ද්‍රයේ පැවති සංවාදයකදී ඒ මහතා මේ අදහස් පළ කළේය.
අත්වැල එකමුතුව සංවිධානය මඟින් මෙම සංවාදය මෙහෙයවනු ලැබීය.
මේ සම්බන්ධයෙන් තොරතුරු දන්නා තවත් පුද්ගලයකු තමයි ෆීල්ඩ් මාෂල් සරත් ෆොන්සේකා මහතා. ඔහු පාස්කු ඉරිදා ත්‍රස්ත ප්‍රහාරය සම්බන්ධයෙන් සොයා බැලීම සඳහා පත් කළ පාර්ලිමේන්තු තේරීම් කාරක සභාවේ සාමාජිකයකුව සිටියා.
මේ තේරීම් කාරක සභාවේදී එවකට රාජ්‍ය බුද්ධි අංශ ප්‍රධානියාව සිටි නියෝජ්‍ය පොලිස්පති නිලන්ත ජයවර්ධන සහ සරත් ෆොන්සේකා අතර ඇති වූ දෙබස හරිම වැදගත්.
මෙහිදී සරත් ෆොන්සේකා මහතා කරන ප්‍රශ්න කිරීම්වලදී රාජ්‍ය බුද්ධි අංශ ප්‍රධානියා කියනවා පාස්කු ඉරිදා ත්‍රස්ත ප්‍රහාරය ගැන ලැබුණු තොරතුරු සත්‍ය වුණේ ඒ ප්‍රහාරය සිදුවූ නිසා බවත් එවැනි ප්‍රහාරයක් සිදු නොවූවා නම් එය අසත්‍ය තොරතුරක් වන බවත්ය. වැදගත් තොරතුරක් ලැබුණාම රටේ රාජ්‍ය බුද්ධි අංශය ක්‍රියාත්මක වෙන්නේ මෙහෙම නම් එවැනි බුද්ධි සේවයක් රටට අවශ්‍ය ද?
බලන්න රටේ වගකිවයුතුම බුද්ධි අංශයේ ප්‍රධානියා වැදගත් පරීක්ෂණ කොමිසමක් හමුවේ උත්තර දුන්න හැටි.
අහිංසක මිනිස්සු විශාල ප්‍රමාණයක් මැරුණාට පස්සේ කියනවා ඒක සත්‍ය තොරතුරක් කියලා. අන්න ඒ වගේ නොසැලකිලිමත් ආකාරයට තමයි එදා රාජ්‍ය බුද්ධි සේවය කටයුතු කරලා තියෙන්නේ.
මේ ප්‍රහාරයේ තොරතුරු ඊට පැය විසිහතරකට කලින් දැන ගත්තා නම් රටේ ජනාධිපතිට හරි අගමැතිට හරි කියන්න ඕනෑ ද නැද්ද ? පැය දහසයකට කලින් මේ තොරතුරු තහවුරු කර ගත්තා නම් ඒ ගැන රටේ ඉහළට දැනුම් දෙන්නේ නැද්ද? නමුත් මේ නිලධාරියා එහෙම කරලා නැහැ.
ඊළඟට සාක්කි දෙමින් රනිල් වික්‍රමසිංහ කියනවා මේ තොරතුරු එයා කලින් දැන ගත්තා නම් ඉන්දියාවේ මහකොමසාරිස්වරයාට කතා කරලා විස්තර දැන ගන්නවා කියලා. දැනගෙන මම හමුදා ප්‍රධානීන්ට කියලා මේක වළක්වන්න පියවර ගන්නවා කියලා රනිල් වික්‍රමසිංහ කියනවා. ඉන්දියාව මෙච්චර විශ්වාසවන්ත තොරතුරක් දීලා තියෙද්දීත් මේ ප්‍රහාරය වළක්වාගෙන මිනිස් ජීවිත ආරක්ෂා කර ගැනීමට නොහැකි වීම ගැන තමන් කනගාටු වෙනවා කියලා ඔහු මේ කොමිසම හමුවේ කියනවා. අන්තිමට රටේ අගමැතිත් මේ ප්‍රහාරය ගැන දැනගෙන ඉඳලා නැහැ.
