ඉන්දියාවේ බෙංගාල මුහුදු තීරයෙන් ඔඩීෂා ප්‍රාන්තයට ඇතුළුවූ ‘ඩානා‘ සුළි කුණාටුව අවම අාපදා තත්ත්වයකින් පසු ක්‍රමයෙන් පහව යමින් පවතින බව ඉන්දීය මාධ්‍ය වාර්තා කළේය. ඊයේ පස්වරුවේ ඔඩීෂා ප්‍රාන්තයට කඩා වැදුණු සුළි කුණාටුවෙන් මහාමාර්ග සහ විශාල ගස් කඩා වැටුණද, වාර්තා වූයේ එක් ජීවිත හානියක් පමණක් බව එරට මාධ්‍ය වැඩිදුරටත් වාර්තා කළේය. සුළි කුණාටුව හේතුවෙන් අත්හිටුවා තිබූ දුම්රිය ධාවනය සහ ගුවන් ගමන් නැවත ආරම්භ කර ඇතැයි බටහිර බෙංගාලයේ ප්‍රධාන ඇමතිනිය මමතා බෙනර්ජි ප්‍රකාශ කර තිබේ. ඊයේ වන විට දුර්වල වූ ‘ඩානා‘ සුළි කුණාටුව රාත්‍රිය වන විට උතුරු ඔඩීෂා දෙසින් වයඹ දෙසට ගමන් කර දුර්වල වනු ඇතැයි ඉන්දීය කාලගුණ විද්‍යා දෙපාර්තමේන්තුව අනාවැකි පළ කර තිබිණි. කෙසේ වුවද ඇතැම් පළාත්වල අඩු පහසුකම් යටතේ ඉදි කළ කුඩා නිවාසවලට පමණක් හානි සිදුවී ඇති අතර, ගස් කඩා වැටීම හේතුවෙන් මහාමාර්ග සහ විදුලි රැහැන්වලට හානි සිදුවී ඇතැයි වාර්තා වේ. සුළි කුණාටුවත් සමඟ ඇද හැලුණු අධික වර්ෂාවෙන් මහාමාර්ග රැසක් ජලයෙන් යටවී ඇතැයි ද එරට මාධ්‍ය සඳහන් කළේය.
