දක්ෂිණ අධිවේගී මාර්ගයේ කිලෝමීටර් 8 දශම 5 කහතුඩුව ප්‍රදේශයේදී ඊයේ (25) අලුයම මාළු ලොරියක් සිමෙන්ති පැටවූ ලොරියක ගැටීමෙන් මාළු ලොරියේ රියැදුරු තුවාල ලබා රෝහල්ගත කළ බව දක්ෂිණ අධිවේගී රථවාහන පොලිසිය කියයි.
එම අනතුරින් මාළු ලොරිය කැබලි කිහිපයකට කැඩී මාළුත් සමඟ මාර්ගය පුරා විසිරී තිබූ බව පොලිසිය සඳහන් කරයි. බහාලුමක සිමෙන්ති කොට්ට 350ක් පටවාගෙන ඉමුදූව කරා යමින් සිටි ලොරියක පිටුපසින් අධි ශීතකරණ සහිත ලොරියක මාළු පටවාගෙන ගාල්ල දෙසට යමින් සිටියදී ඉදිරියෙන් ගමන් ගත් සිමෙන්ති පැටවූ ලොරියේ පිටුපස ගැටී මේ අනතුර සිදුවී තිබූ බව පොලිසිය කියයි.
එම අනතුරත් සමඟ ලොරියේ ඉදිරිපස මුහුණත කොටස සහ අධි ශීතකරණ සහිත පිටුපස කොටස සම්පූර්ණයෙන්ම විනාශ වී තිබූ අතර කොළඹ දෙසට සහ ගාල්ල දෙසට මාර්ගය පුරා කොට‍ෙස් සහ මාළු විසිරී තිබුණි. ලොරියේ රියැදුරු තංගල්ල පදිංචි 46 හැවිරිදි කහතුඩුව වෑතර රෝහල වෙත ඇතුළත් කෙරිණි. අනතුරත් සමඟ ගාල්ල දෙසට ගමන් ගන්නා වාහන මාර්ගයේ දකුණු මං තීරුවත් කොළඹ දෙසට වාහන ගමන් ගන්නා දකුණු මං තීරුව සම්පූර්ණයෙන්ම මාළුවලින් සහ වාහනයේ කොටස්වලින් ඇහිරී තිබිණි. මාළු ලොරියේ රියැදුරුට නින්ද යාම හෝ අපරීක්ෂාකාරී රිය ධාවනය හේතුවෙන් මේ අනතුර වන්නට ඇතැයි පොලිසිය සැක කරයි.
දක්ෂිණ අධිවේගී රථවාහන ගැලනිගම පොලිසියේ ස්ථානාධිපති ප්‍රධාන පොලිස් පරීක්ෂක අශෝක කරුණාරත්න මහතාගේ උපදෙස් මත පොලිස් පරීක්ෂක චන්දන පොලිස් සැරයන් (13516) රත්නසිරි පොලිස් කොස්තාපල්වරුන් වන (82439) කොළඹගේ (78843) චන්දන මහත්වරු පරීක්ෂණ පවත්වති.
