මෙනු කාඩ්පතට ඇතුළත් එක්තරා පීට්සා විශේෂයක් ඇණවුම් කරන සියලු පාරිභෝගිකයන්ට කොකේන් මත්ද්‍රව්‍ය සැපයීමේ ජාවාරමක් බටහිර ජර්මානු පොලිසිය විසින් හෙළිදරව් කරනු ලැබූ බව විදෙස් මාධ්‍ය වාර්තා කළේය. පොලිසියට මේ පිළිබඳ තොරතුරු ලැබී ඇත්තේ පසුගිය මාර්තු මාසයේදී වන අතර, මාස ගණනාවක් පුරා එම අවන්හලේ කටයුතු නිරීක්ෂණය කළ බටහිර ජර්මනියේ පොලිසිය එම පීට්සා අවන්හල වැටලීමට පියවර ගෙන තිබූ බව විදෙස් මාධ්‍ය වැඩිදුරටත් වාර්තා කළේය.
බටහිර ජර්මනියේ ඩිස්ල්ඩෝෆ් නුවර පිහිටි එම අවන්හල වැටලීමෙන් පසු පොලිස් නිලධාරීන් එහි කළමනාකරු ලෙස කටයුතු කරන 36 හැවිරිදි හිමිකරු සොයා ඔහු පදිංචිව සිටි නිවාස සංකීර්ණයට ගිය මොහොතේ ඔහු මත්ද්‍රව්‍ය අඩංගු ගමන් මල්ලක් කවුළුවෙන් පිටතට විසිකර ඇතැයි ද, නිවාස සංකීර්ණයේ පහළ සිටි පොලිස් නිලධාරීන්ගේ අතටම එම ගමන් මල්ල වැටී ඇතැයි ද වාර්තා වේ. මීට අමතරව කොකෙන් කිලෝග්‍රෑම් 1.6ක්, කංසා ග්‍රෑම් 400ක් සහ පවුම් ලක්ෂ දෙකකට අධික මුදල් ප්‍රමාණයක් ඔහුගේ නිවෙසේ තිබී සොයාගත් බව පොලිසිය ප්‍රකාශ කර තිබේ.
දින කිහිපයකට පසු කළමනාකරු නිදහස් කර ඇතැයි ද, ඔහු නැවත සිය අවන්හලේ පීට්සා විශේෂයක් සමඟ කොකෙන් සැපයීමේ කටයුතුවල නිරතවීම හේතුවෙන් යළි අත්අඩංගුවට ගෙන ඇතැයි ද වාර්තා වේ.
පොලිසිය එම මත්ද්‍රව්‍ය ජාවාරම හෙළි කරගැනීමෙන් පසු නිලධාරීන් 150කට අධික පිරිසක් කංසා වගාබිම් කිහිපයක් ද වටලා ඇති අතර, අවිආයුධ, මුදල් සහ සුඛෝපභෝගී අත්ඔරලෝසු රැසක් ද අත්අඩංගුවට ගෙන ඇතැයි වාර්තා වේ.
