ශ්‍රී ලංකාව සහ බටහිර ඉන්දීය කොදෙව් අතර පැවති දෙවැනි එක්දින තරගයෙන් කඩුලු 5ක ජයක් ලැබූ ශ්‍රී ලංකා පිල තවත් තරගයක් ඉතිරිව තිබියදී එක්දින තරගාවලිය 2-0ක් ලෙස ජය වාර්තා කළේය. කාසියේ වාසිය දිනාගත් ශ්‍රී ලංකා පිලේ ආරාධනාවෙන් මුලින් පන්දුවට පහරදුන් කොදෙව් පිල ලකුණු 189ක් රැස් කළ අතර, ශ්‍රී ලංකා ක්‍රීඩකයෝ කඩුලු 5ක් දැවී පන්දු 34ක් ඉතිරිව තිබියදී ලකුණු 190ක් ලබා ජය කණුව පසු කළේය.
ශ්‍රී ලංකා එක්දින නායක චරිත් අසලංක නායකත්වයේ ඉනිමක් ගොඩනඟමින් පන්දු 61ක් තුළ දී හයේ පහරක් හා හතරේ පහර 7ක් සමඟ නොදැවී ලකුණු 62කින් තම 14 වැනි එක්දින අර්ධ ශතකය සම්පූර්ණ කළේය. දින තුනකට පෙර පැවති පළමු එක්දින තරගයේදී අසලංක කොදෙව්වන්ට එරෙහිව ලකුණු 77ක් ලබා ගැනීම තරගාවලි ජයග්‍රහණයට විශාල දායකත්වයක් විය. ඊයේ දිනයේ අසලංකට අනගි සහායක් දුන් ජනිත් ලියනගේ පන්දු 34කදී හතරේ පහර 2ක් හා හයේ පහරක් සමඟ ලකුණු 24ක් ලබා ගැනීමට සමත් වූ අතර, 5 වැනි කඩුල්ලට දෙදෙනා ලකුණු 55ක් එක් කළහ.
ආරම්භක පිතිකරු නිශාන් මධුෂ්ක හා සදීර සමරවික්‍රම ලකුණු 38 බැගින් ලබා ගැනීමට සමත් වූ අතර, දෙදෙනාම හතරේ පහර 6 බැගින් එල්ල කළහ. වෙනසක් වූයේ මධුෂ්ක පන්දු 44කදී හා සමරවික්‍රම පන්දු 50කදී ශ්‍රී ලංකා ඉනිම ශක්තිමත් කිරීමය. කමිඳු මෙන්ඩිස් නොදැවී ලකුණු 11ක් ලබා සිටියේය.
පල්ලෙකැලේ ජාත්‍යන්තර ක්‍රීඩාංගණයට ඊයේ පස්වරුවේ ඇදහැලුණු වර්ෂාව හේතුවෙන් පැය දෙකක් ප්‍රමාද වී ආරම්භ කළ තරගයේ ඉනිමක් ඩක්වර්ත් ලුවිස් න්‍යාය අනුව ඕවර 44කට සීමා කෙරිණි. ශ්‍රී ලංකා දඟ පන්දුව හමුවේ මුලදී නිරුත්තරවූ කොදෙව් ක්‍රීඩකයෝ අවසන් ඕවර කිහිපයේදී ආක්‍රමණශිලී ලෙස යළි හිස එසැවූහ. කොදෙව් පිල මුලදී අසරණභාවයට පත් කිරීමට මහිෂ් තීක්ෂණ හා අසිත ප්‍රනාන්දු සමත්වූ අතර, ආරම්භක පිතිකරුවන් ලෙස පිටියට පිවිසි ඇලික් අතන්සේ හා බ්‍රෙන්ඩන් කිං ලකුණු 17ක් වෙද්දී ක්‍රීඩාගාරයට හරවා යැවූහ.
දඟ පන්දුව ඉදිරියේ අසරණ වූ කොදෙව් පිතිකරුවන් 4ක් දවා ගැනීමට වනිඳු හසරංග සමත්වූ අතර, පළමු තරගයට ක්‍රීඩා කළ ජෙෆ්රි වැන්ඩර්සේ වෙනුවට කණ්ඩායමට එක්වූ මහිෂ් තීක්ෂණ හා වේග පන්දු යැවූ අසිත ප්‍රනාන්දු කඩුලු 3 බැගින් බිඳ හෙළා ගත්හ.
කඩුලු 8ක් ලකුණු 58කට දැවී ගොස් තිබියදී එක්වූ ෂර්ෆේන් රදර්ෆඩ් හා ගුඩාකේෂ් මෝති ශ්‍රී ලංකා පන්දු යවන්නන්ට පහර පිට පහර එල්ල කරමින් එක් කළ වාර්තාගත ලකුණු සබඳතාවෙන් කවුරුත් නොසිතූ ආකාරයට ටැක්සි මීටරයක් සේ කොදෙව් ලකුණු පුවරුව ඉහළ ගියේය.
බටහිර ඉන්දීය කොදෙව් එක්දින ක්‍රිකට් ඉතිහාසයේ 9 වැනි කඩුල්ලට වැඩිම ලකුණු සබඳතාව පල්ලෙකැලේ ක්‍රීඩාංගණයේදී එක් කළ රදර්ෆඩ් හා මෝති පන්දු 115කදී ලකුණු 119ක් වාර්තා පොතට එක් කිරීමට සමත් වූහ. එය ශ්‍රී ලංකාවට එරෙහි එක්දින තරගයකදී වසර 28කට පසු 9 වැනි කඩුල්ලට එක්වූ වැඩිම ලකුණු සබඳතාව ද විය. 1996දී කෙන්යාවේ නයිරෝබි නුවරදී කෙන්යා පිලේ හිතේෂ් මෝදි හා ආසිප් කරීම් ගොඩනැඟූ ලකුණු 89ක සබඳතාව මෙතෙක් ප්‍රතිවාදී කණ්ඩායමකින් ශ්‍රී ලංකාවට එරෙහිව 9 වැනි කඩුල්ලට වාර්තා වූ වැඩිම ලකුණු ගණන ලෙස වාර්තා පොතේ ලියැවී තිබුණද, ඊයේ දිනයේ රදර්ෆඩ් – ගුඩාකේෂ් යුගල එම වාර්තාව බිඳ දැමුහ.
එමෙන්ම 9 වැනි කඩුල්ලට කොදෙව් එක්දින ඉතිහාසයේ හොඳම ලකුණු සබඳතාව ලෙස 2022දී නවසීලන්තයට එරෙහිව යනික් කාරීෂ් හා අල්සාරි ජෝෂප් රැස් කළ ලකුණු 85 ඉක්මවා යෑමට ද ෂර්ෆේන් රදර්ෆඩ් හා ගුඩාකේෂ් මෝති සමත් වූහ.
රදර්ෆඩ් ලකුණු 23ක් ලබා සිටියදී ‘මිඩ් ඕෆ්’හි සිටි ජනිත් ලියනගේ අතට දුන් අහස් කූරක් සේ ඉහළ නැඟි පහසු උඩපන්දුව අත්හැරීමෙන් ශක්තිමත් වූ ඔහු යළි ලකුණු 72ක් ලබා සිටියදී ‘ඩීප් මිඩ් විකට්’හි සිටි නිශාන් මධුෂ්කට තවත් උඩ පන්දුවක් ලබා දුන්නද එම දෙවැනි උඩ පන්දුව ද අත්හැරුණි. පන්දු 82කදී හයේ 4ක් හා හතරේ පහර 7ක් එල්ල කළ රදර්ෆඩ් ලකුණු 80ක් ලබා සිටියදී ‘ඩීප් ස්කුවෙයාර් ලෙග්’හි හතරේ සීමාව අසල සිටි දුනිත් වෙල්ලාලගේ අතට දුන් උඩ පන්දුව රැක ගැනීමෙන් ශ්‍රී ලංකා හිසරදය නිමාවට පත් විය. රදර්ෆඩ් තම එක්දින දිවියේ රැස් කළ තෙවැනි අර්ධ ශතකය මෙය වූ අතර, එය කොදෙව් ක්‍රිකට් ලෝලීන්ට කිසිදා අමතක නොවනු ඇත. මෝති පන්දු 61කදී හතරේ පහර 6ක් සමඟ නොදැවී ලකුණු 50ක් ලබා කුළුඳුල් එක්දින අර්ධ ශතකය වාර්තා කළේය.
ශ්‍රී ලංකා – කොදෙව් තෙවැනි හා අවසන් එක්දින තරගය මේ 26 වැනිදා පස්වරු 2.30ට පල්ලෙකැලේ ක්‍රීඩාංගණයේදී ආරම්භ වීමට නියමිතය.
