මහනුවර වත්තේගම අධ්‍යාපන කලාපයට අයත් කුණ්ඩසාලේ කෙහෙළිය රඹුක්වැල්ල ආදර්ශ ප්‍රාථමික විද්‍යාලයේ නම කුණ්ඩසාලේ රාජකීය ප්‍රාථමික විද්‍යාලය ලෙස වෙනස් කිරීමට අනුමැතිය ලැබීමෙන් පසු නව නාමපුවරුව විවෘත කිරීම ඊයේ (23) පෙරවරුවේ උත්සවාකාරයෙන් සිදු කෙරිණි.
ප්‍රමිතියෙන් තොර ඖෂධ ආනයනය කිරීම සම්බන්ධයෙන් කෙහෙළිය රඹුක්වැල්ල මහතාට අපරාධ චෝදනා එල්ල වීමත් සමඟ මෙම විදුහලේ නම වෙනස් කරන ලෙස ගුරු සංගම් ඇතුළු පාර්ශ්ව රැසකින් ඉල්ලීම් ඉදිරිපත් වුවත් පසුගිය ආණ්ඩු සමයේ එය ක්‍රියාත්මක නොවිණි.
මධ්‍යම පළාත් ආණ්ඩුකාර ධුරයට එස්.බී. අබේකෝන් මහතා පත්වීමත් සමඟ අදාළ පාසලේ නම වෙනස් කිරීම සඳහා පළාත් අධ්‍යාපන දෙපාර්තමේන්තුවේ ව්‍යුහ කමිටුව මඟින් ඉදිරිපත් කර තිබූ යෝජනාවට අනුමැතිය ලබා දුන්නේය.
ඒ අනුව පාසලේ නම කුණ්ඩසාලේ රාජකීය ප්‍රාථමික විද්‍යාලය ලෙස වෙනස් වූ අතර, නව නාමපුවරුව විවෘත කිරීමේ අවස්ථාවට පාසල් බලධාරීන් ද දෙමාපියන් ද පාසල් සංවර්ධන කමිටුවේ සාමාජිකයෝ ද සහභාගි වූහ.
විදුහලේ ප්‍රධාන නාමපුවරු දෙකක් මහනුවර මහියංගණය ප්‍රධාන මාර්ගයේ වරාපිටිය හන්දියේ පාසල් වෙත ප්‍රවිෂ්ට වන මාර්ගය අසල හා පාසල් භුමියේ ස්ථාපනය කර තිබේ.
දැනට ජීවතුන් අතර සිටින දේශපාලනඥයන්ගේ නම් පාසල්වලින් ඉවත් කරන ලෙස ඉල්ලීම් ගණනාවක් සිදු කර තිබෙන බවත් මධ්‍යම පළාතින් ආදර්ශයක් ලබා දෙමින් කෙහෙළිය රඹුක්වැල්ල හිටපු ඇමැතිවරයාගේ නම කුණ්ඩසාලේ ප්‍රාථමික විදුහලෙන් ඉවත් කිරීම අගය කරන බවත් ලංකා ගුරු සංගමයේ ලේකම් ජෝසප් ස්ටාලින් මහතා කීය.
මහනුවර දිස්ත්‍රික්කයේ පමණක් හිටපු සරත් ඒකනායක මහතාගේ නම සඳහන් පාසල් පහක් තිබෙන බවත් ඒවාහි නම් ද ඉවත් කරන ලෙස ඉල්ලීම් කර තිබෙන බවත් ඒ මහතා පැවසුවේය.
