කැලණිය විශ්වවිද්‍යාලයේ කළමනාකරණ පීඨයේ සිසුවකු ඊයේ (23) අලුයම තුනයි තිහට පමණ කැලණිය පොල්හේනේ පිහිටි කන්නන්ගර නේවාසිකාගාරයේ හතර වැනි මහලේ වහලෙන් බිමට ඇදවැටී බරපතළ තුවාල ලබා මියගොස් ඇත.
මෙලෙස මියගොස් ඇත්තේ ප්‍රින්ස් රාජු බණ්ඩාර නමැති බිබිල රිදීමාලියද්ද ප්‍රදේශයේ පදිංචිව සිටි කැලණිය විශ්වවිද්‍යාලයේ වාණිජ හා කළමනාකරණ අධ්‍යයන පීඨයේ ගණකාධිකරණ අංශයේ සිව් වැනි වසරේ ඉගෙනුම ලබමින් සිටි සැන්ඩා නමින් විශ්වවිද්‍යාලයේ සිසුන් අතර ප්‍රසිද්ධව සිටි ශිෂ්‍යයෙකි.
22 වැනිදා රාත්‍රී සිසුන් පිරිසක් සමඟ නේවාසිකාගාරය තුළ සාදයක් පවත්වා ඇති අතර මියගිය සිසුවා ද එයට එක්වී මිතුරන් සමඟ කා බී විනෝද වී රාත්‍රී දොළහයි තිහට පමණ සිය කාමරයට පැමිණ ඇති බව සඳහන්ය.
අලුයම තුනට පමණ යළි නැඟිට ශාරීරික අවශ්‍යතාවක් සඳහා නේවාසිකාගාර ජනේලයෙන් කකුලක් එළියට දමමින් ඒ මත වාඩි වීමට සූදානම් වූ අවස්ථාවේ බිමට ඇදවැටී මියගොස් ඇතැයි මේ වන විට සිදු කළ විමර්ශනවලින් පෙනී ගොස් ඇත.
උඩුමහලින් බිමට ඇදවැටීමෙන් මියගිය තරුණයාගේ හිසට දැඩි හානි සිදු වී තිබුණු බව අනතුර පිළිබඳ පරීක්ෂණ කළ පොලිස් නිලධාරීහු පැවසූහ. සිරුර කිරිබත්ගොඩ රෝහලේ තබා ඇති අතර මියගිය සිසුවාගේ ඥාතීන් පැමිණි සිරුර හඳුනා ගැනීමෙන් පසු පශ්චාත් මරණ පරීක්ෂණය සිදු කිරීමට නියමිතය. කිරිබත්ගොඩ සහ පෑලියගොඩ පොලිසිය එක්ව මෙම සිදුවීම සම්බන්ධයෙන් වැඩිදුර පරීක්ෂණ සිදු කරයි.
