මේ වසරේ සැප්තැම්බර් මස 30 දක්වා ඩීසල් භාවිතයෙන් විදුලිය නිපදවා ඇත්තේ සියයට 1.1ක ප්‍රමාණයක් පමණක් බව ලංකා විදුලිබල මණ්ඩලය අවධාරණය කරයි.
ලංකා විදුලිබල මණ්ඩලය විදුලිය නිපදවීම සඳහා ඛනිජතෙල් ඉන්ධන වර්ග තුනක් භාවිත කරන අතර බැර තෙල් (HFO) – 2024 වර්ෂයේ දී සැප්තැම්බර් මස 30 වැනි දිනට 715.3 GWh (මුළු විදුලි නිෂ්පාදනයෙන් සියයට 5.8), නැප්තා (Naphtha) – 2024 වර්ෂයේ දී සැප්තැම්බර් මස 30 වැනි දිනට 235.5 GWh (මුළු විදුලි නිෂ්පාදනයෙන් සියයට 1.9) සහ ඩීසල් (Diesel) – 2024 වර්ෂයේ දී සැප්තැම්බර් මස 30 වැනි දිනට 133.1 GWh (මුළු විදුලි නිෂ්පාදනයෙන් සියයට 1.1) ඒ අතර වන බව ලංකා විදුලිබල මණ්ඩලය පවසයි.
බැර තෙල් (HFO) සහ නැප්තා (Naphtha) යන වර්ග දෙකම තෙල් පිරිපහදුවේ අතුරු නිෂ්පාදන බව පෙන්වාදෙන එම මණ්ඩලය වෙනත් සැපයුම්කරුවකු නොමැති බැවින් ලංකා විදුලිබල මණ්ඩලය මෙම ඉන්ධන ලංකා ඛණිජතෙල් නීතිගත සංස්ථාවෙන් මිලදී ගන්නේ අන්‍යෝන්‍ය වශයෙන් එකඟ වූ මිලකට බව ද තරගකාරී ලංසු තැබීම් මගින් ලංකා විදුලිබල මණ්ඩලයට මිලදී ගතහැකි එකම ඉන්ධනය ඩීසල් බව ද පෙන්වා දෙයි.
ඩීසල් සඳහා පමණක් බෙදාහරින්නන් කිහිප දෙනෙකු සිටින අතර, ඔවුන්ගෙන් සමහරක් මෑතක දී සිය ව්‍යාපාර කටයුතු ආරම්භ කර ඇති බව සඳහන් කරන එම මණ්ඩලය කෙසේ වෙතත්, ලංකා විදුලිබල මණ්ඩලය මීට පෙර පැවති කළමනාකාරීත්වය යටතේ පවා විදුලි උත්පාදනය සඳහා තරගකාරී ලංසු මඟින් ඩීසල් මිලදී ගෙන නොමැති බවද විදුලි උත්පාදනය සඳහා තරගකාරී ලෙස ඩීසල් මිලදී ගැනීමට එරෙහිව නව කළමනාකාරිත්වය කිසිදු තීරණයක් ගෙන නොමැති බව අවධාරණය කරයි.
ලංකා විදුලිබල මණ්ඩලය ඩීසල් ඉන්ධනය ආර්ථික වශයෙන් ශක්‍ය විදුලි උත්පාදන විකල්පයක් ලෙස නොසලකන අතර ඊට අමතරව පිරිසිදු බල ශක්තිය වෙත සංක්‍රමණය වීම සඳහා ශ්‍රී ලංකාවේ විමෝචන ඉලක්ක සැලකිල්ලට ගනිමින් පරිවර්තනය වෙමින් පවතී. කෙසේ වෙතත්, වර්තමාන ජනන මිශ්‍රණය සැලකිල්ලට ගනිමින් සහ අනෙකුත් විශාල විදුලි බලාගාරවල බිඳ වැටුම් යථා තත්ත්වයට පත්කිරීමේ කටයුතුවලදී පමණක් උපරිම ඉල්ලුම සපුරාලීම සඳහා ඩීසල් බලාගාරවල අවම භාවිතයක් අවශ්‍ය වන බව ලංකා විදුලිබල මණ්ඩලය කියයි.
විදුලි උත්පාදනය සඳහා ඩීසල් භාවිත කිරීම අවම හා කෙටි කාලීන වනු ඇති අතර 2024 වර්ෂයේ දී සැප්තැම්බර් මස 30 වැනි දිනට ඩීසල් භාවිතයෙන් විදුලිය නිපදවා ඇත්තේ සියයට 1.1ක ප්‍රමාණයක් පමණි. ලංකා විදුලිබල මණ්ඩලය සිය සියලු ව්‍යාපාර කටයුතුවලදී තරගකාරී ක්‍රියාපටිපාටිය සහතික කරන බවද සනාථ කරයි.
