ඉන්දු පැසිෆික් උපායමාර්ගික බුද්ධි ඒකකය සහ එරට සක්කේයි ෂිම්බුන් පුවත් සේවය ඒකාබද්ධව මෑතකදී කරනු ලැබූ සමීක්ෂණයකට අනුව එරට 71%ක ප්‍රතිශතයක් තායිවානය ස්වාධීන රාජ්‍යයක් ලෙස පිළිගෙන ඇතැයි විදෙස් මාධ්‍ය වාර්තා කළේය. ජපානය සහ තායිවානය අතර විධිමත් ආකාරයෙන් රාජ්‍යතාන්ත්‍රික සබඳතා වර්ධනය කරගැනීමට එම සමීක්ෂණය ඉවහල් වනු ඇතැයි ද විදෙස් මාධ්‍ය වැඩිදුරටත් වාර්තා කළේය.
පසුගිය සැප්තැම්බර් මස 21 වැනිදා ජපානයේ ප්‍රධාන නගර 8ක් පුරා සිදු කර ඇති එම සමීක්ෂණයට තුන්දහසකට අධික ජපාන වැඩිහිටියන් පිරිසකගේ දායකත්වය ලැබී ඇතැයි ද, තායිවානය පිළිබඳ ඔවුන්ගෙන් ප්‍රශ්න 14ක් විමසා එම සමීක්ෂණය සකස් කර ඇතැයි ද විදෙස් මාධ්‍ය සඳහන් කළේය.
තායිවානය පිළිබඳ ජපානයේ මහජන මතය විමසා බැලීමේ පියවරක් ලෙස පැවැති එම සමීක්ෂණයට අනුව තායිවානය තවදුරටත් චීනයේ කොටසක් ලෙස ප්‍රකාශ කර ඇත්තේ 8%ක ප්‍රතිශතයක් පමණක් බවත් විදෙස් මාධ්‍ය වාර්තා කළේය. තවත් 20%ක පමණ ප්‍රතිශතයක් තායිවානයේ තත්ත්වය පිළිබඳ පැහැදිලි අවබෝධයක් නොතිබුණු බවත් වාර්තා වේ.
