දඹුල්ල ප්‍රදේශයේ දියර පොහොර නිෂ්පාදන ආයතනයක් සඳහා තමන්ගේ ආශීර්වාදය හෝ අනුමැතිය ලබා දුන් බවට සනාථ කළ හැකි එකදු සාක්ෂියක් හෝ ඉදිරිපත් කරන්නැයි හිටපු කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා අදාළ පාර්ශ්ව වෙතින් ඉල්ලීමක් කර තිබේ.
පෙරේදා (10) පුවත්පත් කිහිපයක පළ වී ඇති දඹුල්ල ප්‍රදේශයේ දියර පොහොර නිෂ්පාදන ආයතනයක් සම්බන්ධයෙන් හිටපු කෘෂිකර්ම හා වැවිලි කර්මාන්ත අමාත්‍ය මහින්ද සම්බන්ධතාවක් ඇතැයි කියවෙන පුවත්පත් වාර්තා සම්බන්ධයෙන් අවධානය යොමු කරමින් අමරවීර මහතා මෙම ඉල්ලීම සිදුකර ඇත. තමන් අමාත්‍ය තනතුරු දැරූ කිසිදු අවස්ථාවක හෝ නීති විරෝධී කටයුතු සඳහා තමන් අනුබල දී නැතැයි ද හිටපු අමාත්‍යවරයා ප්‍රකාශයක් නිකුත් කරමින් අවධාරණය කර තිබේ.
මෙම දියර පොහොර නිෂ්පාදන සමාගම, හිටපු කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතාගේ ආශීර්වාදයෙන් ස්ථාපිත කළ බවට එහි අයිතිකරුවන් ප්‍රකාශ කළ බව ද ඇතැම් මාධ්‍ය වාර්තාවල සඳහන් වී තිබිණි.
