සබරගමුව පළාත් ආදායම් දෙපාර්තමේන්තුව සෑම වසරකම රුපියල් මිලියන 1100 (රු.කෝටි 110) ඉක්මවා ආදායම් උපයාගෙන ඇතැයි පළාත් ආදායම් කොමසාරිස් නන්දනී ගුණවර්ධන මහත්මිය ප්‍රකාශ කළාය.
සබරගමු පළාත් ආදායම් කොමසාරිස්වරිය මේ බව සඳහන් කළේ සබරගමු පළාත් ආණ්ඩුකාර චම්පා ජානකී රාජරත්න මහත්මියගේ ප්‍රධානත්වයෙන් පසුගියදා (08) රත්නපුර පිහිටි සබරගමු පළාත් ආදායම් දෙපාර්තමේන්තුවේදී පැවති ප්‍රගති සමාලෝචන රැස්වීමට එක්වෙමිනි.
මෙහිදී අදහස් දැක්වූ පළාත් ආදායම් කොමසාරිස් නන්දනී ගුණවර්ධන මහත්මිය පැවසුවේ, පසුගිය 2023 වර්ෂයේ පළාත් ආදායම් දෙපාර්තමේන්තුව රුපියල් මිලියන 1247ක මුදලක් රජය වෙත උත්පාදනය කර ඇති බවය.
මෙම වර්ෂය (2024) තුළ මේ වන විට රුපියල් මිලියන 1069 මුදලක් රජය වෙත සබරගමුව පළාත තුළින් ආදායම් ලෙස උත්පාදනය කර ඇති බවත් එය මෙම වර්ෂය අවසන් වන විට රුපියල් මිලියන 1300ක් පමණ වන බවත් නන්දනී ගුණවර්ධන මහත්මිය මෙහිදී සඳහන් කළාය.
පළාත් සභාව වෙත පැවරී ඇති බලතල අනුව මුද්දර ගාස්තු, ඛනිජ හා ඖෂධ මත මෙම බදු වාර්ෂිකව ඉපයීම සිදු කරන බව සබරගමු පළාත් ආදායම් කොමසාරිස්වරිය වැඩිදුරටත් පැවසුවාය.
දැනට තක්සේරුකරුවන් 11දෙනකු සහ ප්‍රවාහන පහසුකම් අවම මට්ටමක පැවතීම සබරගමුව පළාත තුළ ආදායම් උත්පාදනය සඳහා විශාල බාධාවක්ව පවතින බව සබරගමු පළාත් ආදායම් කොමසාරිස් නන්දනී ගුණවර්ධන මහත්මිය සඳහන් කළාය.
මෙහිදී අදහස් දැක්වූ සබරගමු පළාත් ආණ්ඩුකාර චම්පා ජානකී රාජරත්න මහත්මිය පැවසුවේ රාජ්‍ය ආදායම් උත්පාදනය සඳහා සබරගමු පළාත් ආදායම් දෙපාර්තමේන්තුව ගෙනයන පියවර සඳහා රජය ලෙස උපරිම දායකත්වය ඊට ලබා දෙන බවය.
මෙම අවස්ථාවට සබරගමු පළාත් ප්‍රධාන ලේකම් මහින්ද එස්. වීරසූරිය, නියෝජ්‍ය ප්‍රධාන ලේකම් (මූල්‍ය) සරත් සේනාරත්න යන මහත්වරු ඇතුළු පිරිසක් එක්ව සිටියහ.
