මෙතෙක් කලක් එක්සත් ජාතික පක්ෂයට සහ ශ්‍රී ලංකා පොදු ජන පෙරමුණට ඡන්දය දුන් ජනතාවට අද තිබෙන එකම විකල්පය සමගි ජන සන්ධානය පමණක් බව එක්සත් ජනරජ පෙරමුණේ නායක පාඨලී චම්පික රණවක මහතා පැවසීය.
ඒ මහතා මේ බව පැවසුවේ සමගි ජන බලවේග පක්ෂ මූලස්ථානයේදී පෙරේදා (02) පැවති මාධ්‍ය හමුවකට එක්වෙමිනි. එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“ජනාධිපතිවරණය වගේ විවිධ විකල්ප කියලා හඳුනාගත් අයට ඡන්දය දී ඔබේ ඡන්දය නාස්ති කර ගන්න එපා යැයි ජනතාවගෙන් ඉල්ලා සිටිනවා. යම්කිසි ආකාරයකට ව්‍යවස්ථා සංශෝධන කරයි නම්, එම ව්‍යවස්ථා සංශෝධනයේ යම් යම් අණපනත් වෙනස් කරන්නේ නම්, ඒ යුක්තිසහගත අණපනත් වෙනස් කිරීම්වලදී අවශ්‍ය සහයෝගය දීමට ඉදිරි කාලයේදී පාර්ලිමේන්තුවේ ක්‍රියා කරනවා.
අපි පළමුවෙන්ම සමගි ජන සන්ධානය හැටියට නව ජනාධිපති අනුර කුමාර දිසානායක මහතාට සුබ පතනවා. ඒ වගේම එළැඹෙන පාර්ලිමේන්තු මැතිවරණයේදී අපි ආරාධනා කරනවා, අපට ඡන්දය දුන් නොදුන් සියලුම දෙනා ප්‍රජාතන්ත්‍රවාදයේ නාමයෙන් ඉදිරි කාලයේදී අපත් එක්ක සන්ධානගතවී මේ රට වෙනුවෙන් ඉදිරි පියවරක් තබන්නට එකමුතු වෙන්න කියලා.”
