ශ්‍රී ලංකා යුද හමුදාවේ 75 වැනි සංවත්සර සැමරුමට සමගාමීව යුද හමුදාවේ සියලු ධජ වෙත සෙත් පැතීම ජය ශ්‍රී මහා බෝධීන් වහන්සේ අබියස දී ඊයේ (27) පෙරවරුවේ සිදු කළේය.
අටමස්ථානාධිපති පල්ලේගම හේමරතන නාහිමිපාණන් වහන්සේ ප්‍රමුඛ අටමස්ථාන විහාරස්ථාන නා හිමිපාණන් වහන්සේගේ අනුශාසකත්වයෙන් සහ ශ්‍රී ලංකා යුද හමුදාපති ලුතිනන් ජෙනරාල් විකුම් ලියනගේ මහතාගේ ප්‍රධානත්වයෙන් මේ පින්කම පැවැත්විණි.
ශ්‍රී ලංකා යුද හමුදාවට අයත් සියලු ධජ රැගත් පෙරහර ජය ශ්‍රී මහා බෝධීන් වහන්සේ වටා පහළ මළුවේ තෙවරක් පැදකුණු කිරීමෙන් අනතුරුව ධජ ජය ශ්‍රී මහා බෝධීන් වහන්සේ අබියස තැන්පත් කර ආශීර්වාද සිදු කෙරිණි. පසුව මහා සංඝරත්නය සෙත් පිරිත් සජ්ඣායනා කරමින් සියලු ධජ වෙත ආශීර්වාද ගැන්වීම කළේය.
මීට සමගාමීව ශ්‍රී ලංකා යුද හමුදාව සහ ලංකා බැංකුව විසින් ඉදිකරන ලද ජය ශ්‍රී මහා බෝධීන් වහන්සේගේ උතුරු වාහල්කඩ අබියස ආරක්ෂිත මුරකුටිය විවෘත කිරීමද සිදු කෙරිණ. තවද අඩු ආදායම්ලාභී පවුල් සඳහා ආරක්ෂක සේනා (වන්නි) විසින් ඉදි කරන ලද නව නිවාස කිහිපයක් ලබාදීමද මෙහිදී සිදු කෙරිණි.
අටමස්ථානාධිපති පල්ලේගම හේමරතන, ලංකාරාමාධිපති රැළපනාවේ ධම්මජෝති, අනුරාධපුර සම්බුද්ධ ජයන්ති මහා විහාරයේ විහාරාධිපති උතුරු මධ්‍යම දෙදිසාවේ ප්‍රධාන සංඝනායක නුගේතැන්නේ පඤ්ඤානන්ද යන නාහිමිපාණන් වහන්සේ ඇතුළු මහා සංඝරත්නය අනුශාසකත්වය කළ මේ අවස්ථාවට යුද හමුදපති ලුතිනන් ෙජනරාල් විකුම් ලියනගේ මහතා ඇතුළු ජ්‍යෙෂ්ඨ නිලධාරීහු රැසක් සහභාගි වී සිටියහ.
