පොලොන්නරුව බකමූණ ප්‍රදේශයේ ප්‍රධාන පෞද්ගලික ඇඟලුම් කර්මාන්ත ශාලාවක පැවැති උපන් දින සාදයකදී ආහාර විෂ වීමෙන් එහි සේවක සේවිකාවන් පන්සීයකට ආසන්න පිරිසක් ඊයේ (19) පෙරවරුවේ බකමූණ සහ අත්තනකඩවල ග්‍රාමීය රෝහල්වලට ඇතුළත් කර ඇතැයි බකමූණ පොලිසිය පවසයි.
අසාධ්‍ය වූ සේවක සේවිකාවන් එම ඇඟලුම් කර්මාන්ත ආයතනයේ බස් රථවලින් හා ගිලන් රථ මඟින් බකමූණ ප්‍රාදේශීය රෝහලටත් අත්තනකඩවල ග්‍රාමීය රෝහලටත් ඇතුළත් කළ බව ද පොලිසිය කියයි.
බකමූණ ප්‍රාදේශීය රෝහලේ ඉඩකඩ මඳ හෙයින් තවත් පිරිසක් බස් රථවලින් හා ගිලන් රථ මඟින් අත්තනකඩවල රෝහලට රැගෙන යෑමට කටයුතු කර ඇති බව ද රෝහල් ආරංචි මාර්ගවලින් පැවසේ. අත්තනකඩවල සහ බකමූණ රෝහලට ඇතුළත් කර ඇඟලුම් කර්මාන්ත සේවක, සේවිකාවන්ගේ තත්ත්වය බරපතළ නොවන බවත් ඔවුන් ප්‍රතිකාර ගනිමින් සිටින බවත් බකමූණ හා අත්තනකඩවල රෝහලේ ප්‍රකාශකයෙක් සඳහන් කළේය. මෙම රෝගී තත්ත්වය පෙරේදා (18) සවස් වන විට කිහිපදෙනකුට හටගෙන ඇති අතර ඊයේ (19) සේවය සඳහා ආයතනයට පැමිණීමෙන් අනතුරුව රෝගී තත්ත්වය උත්සන්න වී ඔවුන් රෝහල්ගත කර ඇති බව පොලිසිය කියයි.
මෙම ඇඟලුම් කර්මාන්ත ආයතනයේ සේවය නියුතු සේවක සේවිකාවන් 800 දෙනකු පමණ පෙරේදා (18) රාත්‍රියේ පැවැති උපන්දින සාදයකට සහභාගි වී ඇති බවත් එහිදී ආහාරයට තබා තිබූ කුකුළු මස් වෑංජනය විෂ වීමෙන් බඩේ අජීර්ණය සහ බඩේ කැක්කුම ඇති වී තිබෙන බවට තොරතුරු ලැබී ඇති බව බකමූණ පොලිස් ස්ථානාධිපති පොලිස් පරීක්ෂක උපුල් බොලුකඳුර මහතා අප කළ විමසීමකදී සඳහන් කළේය.
සිද්ධිය සම්බන්ධයෙන් බකමූණ පොලිස් ස්ථානාධිපති පොලිස් පරීක්ෂක උපුල් බොලුකඳුර මහතා ඇතුළු පොලිස් නිලධාරීහු පරීක්ෂණ සිදු කරති.
