ශ්‍රීලංකන් ගුවන් සේවය තම ගුවන් යානාවල Economy පන්තියේ ගමන් කරන මගීන් වෙනුවෙන් Serendib Delights නමින් ආහාරපාන කල්තබා ඇණවුම් කිරීමට අවස්ථාව සලසා දෙන සුවිශේෂී සේවාවක් ආරම්භ කර තිබේ.
මෙමඟින් මගීන්ට තම ගුවන් ගමනට පෙර ඉතාමත් සැලකිල්ලෙන් යුතුව පිළියෙල කරන ලද ආහාරපාන එකතුවක් අතරින් තමන් කැමති ආහාරපාන ඇණවුම් කිරීමට හැකියාව ලැබෙන අතර මෙයින් මගීන්ට තම ගුවන් ගමන වඩාත් ප්‍රසන්න අත්දැකීමක් බවට පත්වනු නොඅනුමානයි.
Serendib Delights සේවාව යටතේ මගීන්ට සැමන් ස්ටේක්, චිකන් ලම්ප්රයිස්, ෆිලට් ස්ටේක්, ෆිෂ් ෆ්‍රිටර්ස්, බීෆ් බර්ගර්, සීල්ෆුඩ් පායි මෙන්ම අරාබි, ඉන්දියානු සහ බටහිර ආහාරපාන සම්ප්‍රදායන්ට අයත් තවත් ආහාරපාන වර්ග රාශියක් කල්තබා ඇණවුම් කළ හැකිය.
මේ පිළිබඳව අදහස් දැක්වූ ශ්‍රීලංකන් ගුවන් සේවයේ ජ්‍යෙෂ්ඨ කළමනාකරු (වාණිජ සේවා හා සහය) ගයාන් වික්‍රම මහතා මෙලෙස පැවසීය.
“අපගේ මගීන් සියලුම දෙනාට තම ගුවන් ගමන්වලදී සුවිශේෂී අත්දැකීමක් තිළිණ කිරීමට අප සෑමවිටම උත්සාහ කරනවා. Serendib Delights යනු මගීන්ට ශ්‍රීලංකන් ගුවන් සේවයේ විශේෂඥ සූපවේදීන් විසින් පිළියෙල කරන ප්‍රණීත ආහාරපාන සහනදායී මිල ගණන් යටතේ ගැනීමට අවස්ථාව සලසා දෙන සුවිශේෂී සේවාවක්.”
මේ සේවාව හරහා ආහාරපාන ඇණවුම් කිරීමේදී ගුවන් යානය පිටත්වීමට නියමිත වෙලාවට අවම වශයෙන් පැය 48කට පෙර අදාළ ඇණවුම් දිය යුතුය. ශ්‍රීලංකන් ගුවන් සේවයේ නිල වෙබ් අඩවිය හරහා මෙන්ම ශ්‍රී ලංකාවේදී නම් 1979 දුරකතන අංකය ඔස්සේ ද, ශ්‍රී ලංකාවෙන් පිටතදී නම් +94 777 77 1979 දුරකතන අංකය ඔස්සේ ද පැය 24 පුරා ක්‍රියාත්මක සහාය සේවාව ඇමතීමෙන් හෝ තම සංචාරක සේවා නියෝජිතයා හරහා ආහාරපාන ඇණවුම් කළ හැකිය. Serendib Delights සේවාවේ මෙනු පත් පරික්ෂා කිරීමට https://www.srilankan.com/en_uk/flying-with-us/premium-meals වෙත ද පිවිසිය හැකිය.
