ශ්‍රී ලංකාවේ සංවර්ධන වේගය නංවන සහ අනාගත පැවැත්ම සඳහා වන නිර්දේශ ජනාධිපති අපේක්ෂකයන් වෙත පිළිගැන්වීමට පාත්ෆයින්ඩර් පදනම පියවර ගෙන තිබේ. ස්වාධීන පර්යේෂණ සහ උපදේශන සංවිධානයක් වන පාත්ෆයින්ඩර් පදනම සම්පාදනය කරන ලද ශ්‍රී ලංකාවේ සංවර්ධන වේගය නංවන සහ අනාගත පැවැත්ම සඳහා නිර්දේශ ඇතුලත් ප්‍රකාශන දෙකක් නිකුත් කර ඇති අතර, ඒවායේ පිටපත් ජනාධිපති අපේක්ෂකයන් වෙත භාර දී ඇත.
ජනාධිපති රනිල් වික්‍රමසිංහ, සමඟි ජන බලවේගයේ නායක සජිත් ප්‍රේමදාස, ශ්‍රී ලංකා පොදුජන පෙරමුණ නියෝජනය කරන නාමල් රාජපක්ෂ, ජාතික ජන බලවේගය මහ ලේකම් ආචාර්ය නිහාල් අබේසිංහ සහ සර්වජන බලය අපේක්ෂක දිලිත් ජයවීර මහත්වරුන්ට මෙලෙස මේ ප්‍රකාශන පිරිනමා තිබේ. මේ වාර්තා මඟින් ඉදිරි රාජ්‍ය පරිපාලනයට ලබා ගත හැකි ප්‍රතිපත්තිමය තේරීම් සඳහා මඟපෙන්වීමක් සලසන අතර, ශ්‍රී ලංකාවේ ආර්ථීක තත්ත්වය ඉක්මන් ප්‍රකෘතියක් වෙනුවෙන් හා දිගුකාලීන ඔරොත්තු දීමේ හැකියාව වර්ධනය ඒකාබද්ධ කරන ඉදිරි මාවතක් සහතික කරනු වැඩපිළිවෙළක් වෙනුවෙන් කරුණු මෙහි අඩංගු කර ඇත.
පාත්ෆයින්ඩර් පදනමේ සභාපති බර්නාඩ් ගුණතිලක, විධායක අධ්‍යක්ෂ ආචාර්ය දයාරත්න සිල්වා, පාත්ෆයින්ඩර් නියෝජනය කරන ආර්.ඩබ්.ආර්. පේමසිරි, වැඩසටහන් විධායක රුමේකා පෙරේරා සහ පර්යේෂණ සහකාර රසාංගි කුමාරිහාමි මහත්ම මහත්මීහු මේ අවස්ථා සඳහා සහභාගි වූ අතර, නිර්දේශ මාලාව ශ්‍රී ලංකා පොදුජන පෙරමුණේ ජනාධිපති ධුර අපේක්ෂක නාමල් රාජපක්ෂ මහතා වෙත පිරිනැමූ අවස්ථාව සේයාරුවෙන් දැක්වේ.
