ජාතික ජන බලවේගය පක්ෂයේ ප්‍රතිපත්ති ප්‍රකාශය කිසිසේත් ප්‍රායෝගික නොවන හුදු ලියවිල්ලක් පමණක් බවත්, එහි ඇතුළත් ප්‍රතිපත්ති ක්‍රියාත්මක කිරීමට අවශ්‍ය මූල්‍ය ප්‍රතිපාදන ප්‍රමාණය හෝ එය සොයාගැනීමේ ක්‍රමවේදය පිළිබඳව ද ඔවුන්ට අවබෝධයක් නැති වග ඒ ප්‍රතිපත්ති ප්‍රකාශයෙන් පැහැදිලි වන බවත් ජාතික බැංකු සේවක සංගමයේ ලේකම් අසේල ප්‍රනාන්දු මහතා පැවැසීය.
ඔහු මේ බව සඳහන් කළේ කොළඹ, මල් පාරේ පිහිටි ජනාධිපති රනිල් වික්‍රමසිංහ මහතාගේ දේශපාලන කාර්යාලයේ පෙරේදා (27) පැවති මාධ්‍ය හමුවේදීය.
එහිදී වැඩිදුරටත් අදහස් දැක්වූ ජාතික බැංකු සේවක සංගමයේ ලේකම්වරයා මෙසේ ද පැවසීය.
‘ජාතික ජන බලවේගය පක්ෂයේ ප්‍රතිපත්ති ප්‍රකාශය අධ්‍යයනය කිරීමේදී අපට හැඟී ගියේ එහි තේමාව ‘සිහින පාරාදීසයක් – බිලියන ගණනාවක්’ ලෙස සංශෝධනය විය යුතු බවයි. එහි සඳහන් පොරොන්දු ඉටු කිරීමට කොතරම් මූල්‍ය ප්‍රතිපාදන ප්‍රමාණයක් අවශ්‍යය ද, ඒවා සපයාගන්නේ කෙසේද යන්න සම්බන්ධයෙන් ඔවුන්ටත් අදහසක් නැති බව එය කියවන විට තහවුරු වෙනවා. ඒත් එය කියවන කෙනකු සිහින පාරාදීසයකට නම් රැගෙන යනවා.
ජනාධිපති රනිල් වික්‍රමසිංහ මහතා විසින් රාජ්‍ය සේවයේ අවම වැටුප රුපියල් පනස් පන් දහස දක්වා ගෙන එන යෝජනාව 2025 අය-වැයට ඉදිරිපත් කරන බව පැවැසුවා. ඒ වගේම ජීවන වියදම් දීමනාව රුපියල් විසි පන් දහස දක්වා වැඩි කරන බවත් ප්‍රකාශ කළා. පසුගිය කාලයේ ජාතික ජන බලවේගයේ වෘත්තීය සමිති වැඩ වර්ජන කරමින් ඉල්ලා සිටියේ මේ ඉල්ලීම් නොවේද? එහෙත් වෘත්තීය සමිති රැසක් සිටින ජාතික ජන බලවේගයේ ප්‍රතිපත්ති ප්‍රකාශනයේ රාජ්‍ය සේවය පිළිබඳ කිසිවක් සඳහන් වී නැත්තේ ඇයි කියා අප ප්‍රශ්න කරනවා.
එසේම ජනාධිපතිතුමා මේ වන විටත් පුද්ගල ආදායම් මත පනවා ඇති බදු අඩු කිරීම පිළිබඳ ප්‍රශස්ත යෝජනාවක් ජාත්‍යන්තර මූල්‍ය අරමුදල වෙත ඉදිරිපත් කර තිබෙනවා. ඒ පිළිබඳ නිර්දේශ ලද වහා එය ක්‍රියාත්මක කළ හැකියි. එහෙත් පුද්ගල ආදායම් මත පනවා ඇති බද්ද රුපියල් ලක්ෂයේ සිට රුපියල් ලක්ෂ දෙකේ සීමාවට ගෙන එන බවට මොවුන් යෝජනා කර තිබෙනවා. මෙය බැලූ බැල්මට හොඳ යෝජනාවක් වුවත් එහිදී අහිමි වන රුපියල් බිලියන හැට අටක රාජ්‍ය ආදායම සොයාගන්නේ කෙසේද යන්න මෙහි කොතැනකවත් සඳහන් කර නෑ. ඔවුන්ගේ උත්තරය වන්නේ ගෙවීම් පැහැරහරින ලද බදු මුදලින් එම ආදායම් සොයා ගන්නා බවයි. මේ කියන ආකාරයට ඉතා ඉක්මනින් හා පහසුවෙන් හිඟ බදු අය කරගැනීමට හැකියාවක් නෑ. පසුගිය ගෝඨාභය රාජපක්ෂ පාලනය ද වැට් අඩු කළේ මේ ආකාරයටයි. ඒ නිසා මාස කිහිපයක් ගිය තැන ආර්ථිකය දරුණු ලෙස කඩාවැටුණා. රටේ අරගලයක් ද ඇති වුණා. ඒ අනුව නැවතත් ගෝල්ෆේස් අරගලයක් කරා රට තල්ලු වෙයි ද කියා මෙහිදී අප ප්‍රශ්න කරනවා.
ඒ වගේම වත්මන් ආණ්ඩුව විසින් හඳුන්වා දී ඇති ප්‍රතිපත්ති සහ යෝජනා ගණනාවක් ද ඔවුන්ගේ ප්‍රතිපත්ති ප්‍රකාශයට ඇතුළත්ව තිබෙනවා. උදාහරණයක් ලෙස ක්ෂුද්‍ර මූල්‍ය සහ සුළු හා මධ්‍ය පරිමාණ ව්‍යවසායකයන්ට සහන සැලසීමට නව බැංකුවක් ආරම්භ කරන බව එහි සඳහන් වනවා. ඒත් මහ බැංකුවේ නිර්දේශ පරිදි සෑම වාණිජ බැංකුවකම මේ සඳහා වෙනම ඒකකයක් මේ වන විටත් ස්ථාපිත කර තිබෙනවා. ඒ වගේම ප්‍රතිපත්ති පොලී අනුපාතික ස්ථායි කරන බව පවසනවා. එහෙත් මේ රටේ ප්‍රතිපත්ති පොලී අනුපාත මේ වන විට පහළ ගොස් තවදුරටත් ස්ථායි වෙමින් පවතින බව බැංකු වෘත්තිකයන් ලෙස අප මේ රටේ ජනතාවට සඳහන් කරනවා.
ඊට අමතරව ආයෝජන ගැන කතා කර තිබෙනවා. 1977 සිට මේ දක්වා මේ රටට කිසිම විදේශ ආයෝජනයක් ගෙන ඒමට ඉඩ නොදී උද්ඝෝෂණ, වැඩ වර්ජන කර ඒවා කඩාකප්පල් කළ ජවිපෙ මෙවර ප්‍රතිපත්ති ප්‍රකාශයේ පරිච්ඡේදයක්ම ආයෝජන සම්බන්ධව වෙන් කර තිබීම විහිළුවක් වුවත් එය සතුටු විය හැකි කාරණයක් බව පැවැසිය යුතුයි.
තවද අස්වැසුම ප්‍රතිලාභ වෙනුවට රුපියල් දස දහසක් දුප්පත් පවුල් සඳහා දෙන බව මෙහි සඳහන් වෙනවා. අස්වැසුම ප්‍රතිලාභ දෙන්නේ කාණ්ඩ කිහිපයක් යටතේ. එහිදී දැඩි ආර්ථික දුෂ්කරතා ඇති පවුලකට රුපියල් පහළොස් දහසක් දෙනවා. එසේ නම් ජවිපෙ ප්‍රමුඛ ජාතික ජන බලවේගය මේ රුපියල් පහළොස් දහස ලබන පවුලටත් දෙන්නේ රුපියල් දස දහසක්ද කියා අප ප්‍රශ්න කරනවා. ප්‍රතිපත්ති ප්‍රකාශයේ සඳහන් ආකාරයට නම් පැහැදිලිව ඉතා දුෂ්කරම ආර්ථික තත්ත්වයේ සිටින පිරිසට ලැබෙන මුදලෙහි කප්පාදුවක් සිදු වෙනවා. ඒ වගේම මේ මුදල් සොයාගැනීමේ ක්‍රමවේදය කුමක්ද කියා මෙහි කිසිම ආකාරයකින් සඳහන් කර නෑ.
සැබැවින්ම මේ ප්‍රතිපත්ති ප්‍රකාශය අධ්‍යයනය කිරීමෙන් පෙනී යන්නේ එය කිසිසේත් ප්‍රායෝගික නොවන යෝජනා ඇතුළත් හුදු ලියවිල්ලක් බවයි. ඒ නිසා මෙය විචක්ෂණශීලිව කියවා බලා ඒවා ප්‍රායෝගික, යාථාර්ථවාදි යෝජනා ද යන්න වටහාගන්නා ලෙස අප ජනතාවගෙන් ඉල්ලා සිටිනවා. මේ රටට හා අවස්ථාවට ගැළපෙන ආර්ථික ප්‍රතිපත්තියකින් ජනාධිපති රනිල් වික්‍රමසිංහ මහතා මේ රට ගොඩදැමූ බව අප දන්නවා. එම වැඩපිළිවෙළ ඉදිරියට ගෙන ගොස් රටේ ආර්ථිකයත් අපේ ආර්ථිකයක් ගොඩනඟාගන්නවා ද යන්න ඔබ තීරණය කළ යුතුයි.’
ජ්‍යෙෂ්ඨ බැංකු කළමනාකාර (විශ්‍රාමික) ගාමිණී සේනානායක මහතා
‘ණය ප්‍රශස්තකරණයෙන් පසු 2028 වසරේ සිට සාමාන්‍ය පරිදි රට පවත්වාගෙන යෑමට හැකි වන වැඩසටහනකට අයිඑම්එෆ් සංවිධානය විසින් ශ්‍රී ලංකාව ඇතුළත් කර තිබෙනවා. රජය කටයුතු කරමින් සිටින්නේ ඒ අනුවයි. කිසියම් පාර්ශ්වයක් මේ වැඩසටහනින් ඉවත් වනවා නම් නැවතත් මේ රට ආර්ථික වශයෙන් අර්බුදයට ලක් වී ගොඩගැනීමට නොහැකි තත්ත්වයේ ගරාවැටීමකට ලක් වෙනවා. ඇත්ත වශයෙන්ම මේ අවස්ථාවේ මේ රටට අවශ්‍ය වන්නේ මේ වන විට ගොඩනඟා ගනිමින් පවතින රටේ ආර්ථිකය ශක්තිමක් කිරීමේ වැඩපිළිවෙළ ඉදිරියට ගෙන යන නායකයකු මිස කවුරුන් හෝ පක්ෂයක නායකයෙක් නොවෙයි. අයිඑම්එෆ් වැඩසටහන විධිමත්ව ක්‍රියාත්මක කරමින්, ජාත්‍යන්තරයේ පවා ඇගයුමට ලක් වන ආකාරයෙන් මේ රට නැවත නඟාසිටුවූ ජනාධිපති රනිල් වික්‍රමසිංහ මහතාගේ නායකත්වය මේ රටට තවදුරටත් අවශ්‍ය වන්නේ ඒ නිසයි.’
