ශ්‍රී දළදා සමිඳුන් උදෙසා දඹානේ ආදිවාසීන් විසින් වාර්ෂිකව පවත්වනු ලබන මී පැණි පූජාව අද (15) පෙරවරුවේදී පැවැත්වෙයි. මී පැණි පූජාව සෑම වසරකම පළමු රන්දෝලි පෙරහර දින පැවැත්වෙන අතර, ඒ සඳහා වැදිනායක ඌරුවරිගේ වන්නියලෑත්තන් ප්‍රමුඛ හතළිස් දෙනකුගෙන් පමණ සමන්විත ආදිවාසීහු පිරිසක් සහභාගි වෙති.
ආදිවාසි නායකයා ඇතුළු පිරිස මී පැණි පූජාවෙන් පසු මහමළුවේ සිට රන්දෝලි පෙරහර නැරඹීමට ද නියමිතය. මහනුවර ඇසළ පෙරහර මංගල්‍යයේ විචිත්‍රත්වය ඉහළ නංවමින් අද (15) සිට රන්දෝලි පෙරහර වීදි සංචාරය කරන අතර, ශ්‍රී දළදා මාලිගාව අබියසින් සවස 6.45ට නිරිත දිශාභිමුඛව පිටත් වන පෙරහර දළදා වීදිය, ඩී.එස්. සේනානායක වීදිය, පන්සල පාර, දේව වීදිය, කොළඹ වීදිය ඔස්සේ ගමන් කර, නැවත ඊ.එල්. සේනානායක වීදිය, හරස් වීදිය, ඩී.එස් සේනානායක වීදිය ඔස්සේ ගමන් ගෙන රජ වීදියෙන් ඉහළට විත් ගෙවැදීමට නියමිතය.
