එළඹෙන ජනාධිපතිවරණයට ඉදිරිපත්වීම සඳහා ජනාධිපති රනිල් වික්‍රමසිංහ මහතා නාමයෝජනා පත්‍රයට අත්සන් තැබීම කොළඹ මල් පාරේ පිහිටි සිය දේශපාලන කාර්යාලයේදී ඊයේ (14) සිදු කෙරිණි.මේ අවස්ථාවට අගමැති දිනේෂ් ගුණවර්ධන, ඇමැතිවරුන් වන නිමල් සිර්පාල ද සිල්වා, ආචාර්ය බන්දුල ගුණවර්ධන, අලි සබ්රි, කංචන විජේසේකර, රාජ්‍ය ඇමැති පියල් නිශාන්ත, මන්ත්‍රීවරුන් වන එස්.බී. දිසානායක, වජිර අබේවර්ධන, ජනාධිපති කාර්ය මණ්ඩල ප්‍රධානී සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක මහත්වරු ප්‍රමුඛ පිරිසක් එක්ව සිටියහ.
එළඹෙන ජනාධිපතිවරණයට ශ්‍රී ලංකා පොදු ජන පෙරමුණෙන් ඉදිරිපත්වීම සඳහා එම පක්ෂයේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ මහතා කොළඹ විජේරාමේ පිහිටි හිටපු ජනාධිපති මහින්ද රාජපක්ෂ මහතාගේ නිවෙසේදී නාමයෝජනා පත්‍රයට ඊයේ (14) අත්සන් තැබීය. එම අවස්ථාවට හිටපු ජනාධිපතිවරුන් වන මහින්ද රාජපක්ෂ, ගෝඨාභය රාජපක්ෂ, හිටපු ඇමැති බැසිල් රාජපක්ෂ, පක්ෂයේ මහලේකම්, පාර්ලිමේන්තු මන්ත්‍රී සාගර කාරියවසම් මහත්වරුන් ඇතුළු මන්ත්‍රීවරු පිරිසක් එක්ව සිටි අයුරු.
එළඹෙන ජනාධිපතිවරණයට ඉදිරිපත් වීම සඳහා ජනාධිපති රනිල් වික්‍රමසිංහ මහතා කොළඹ මල් පාරේ පිහිටි සිය දේශපාලන කාර්යාලයේදී ඊයේ (14) අත්සන් තැබීය.
මහා සංඝරත්නය මෙහිදී සෙත් පිරිත් සජ්ඣායනා කර ජනාධිපතිවරයා වෙත ආශීර්වාද පළ කළ අතර අන්‍යාගමික පූජකවරු ද ආගමික වතාවත් සිදු කොට ආශීර්වාද පළ කළහ.
අග්‍රාමාත්‍ය දිනේෂ් ගුණවර්ධන මහතා ප්‍රමුඛ මැති ඇමැතිවරුන් රැසක් ද එළඹෙන ජනාධිපතිවරණයේදී ජනාධිපති රනිල් වික්‍රමසිංහ මහතාට සහාය ලබාදෙන දේශපාලන පක්ෂ හා සංවිධානවල නියෝජිතයන් ඇතුළු විශාල පිරිසක් මෙම අවස්ථාවට එක්ව සිටියහ.
ආචාර්ය විජයදාස රාජපක්ෂ, නාමල් රාජපක්ෂ සහ දිලිත් ජයවීර යන ජනාධිපති අපේක්ෂකයන් ද සිය නාමයෝජනා පත්‍රවලට ඊයේ සිය කාර්යාලවලදී අත්සන් තබනු ලැබීය.
සජබ නායක සජිත් ප්‍රේමදාස මහතා අද (15) සිය නාමයෝජනා පත්‍ර අත්සන් කිරීමට නියමිතය.
අනුර කුමාර දිසානායක මහතා පසුගිය 12 වැනිදා නාමයෝජනා පත්‍රයට අත්සන් තැබූ අතර තවත් අපේක්ෂකයන් කිහිපදෙනකු ඇප මුදල් තැන්පත් කිරීමෙන් අනතුරුව පසුගියදා නාමයෝජනා පත්‍රවලට අත්සන් තබනු ලැබීය.
පසුගිය ජූලි 26 වැනිදා නිකුත් කළ අති විශේෂ ගැසට් නිවේදනයක් හරහා ජනාධිපතිවරයකු පත්කර ගැනීම සඳහා නාමයෝජනා කැඳවීම අගෝස්තු 15 වැනිදාත් ජනාධිපතිවරණය පැවැත්වීම සඳහා සැප්තැම්බර් 21 වැනිදාත් යනුවෙන් දින නියම වී ඇති බව දන්වා සිටියේය.
අපේක්ෂකයාගේ නම පිළිගත් දේශපාලන පක්ෂයක් විසින් යෝජනා කරන විට එම පක්ෂයේ ලේකම්වරයා විසින් නාමයෝජනා පත්‍රය අත්සන් කළ යුතු අතර අපේක්ෂකයාගේ නම වෙනත් යම් දේශපාලන පක්ෂයකින් යෝජනා කරන විට එම පක්ෂයේ ලේකම්වරයා විසින් නාමයෝජනා පත්‍රයේ අත්සන් කළ යුතු වේ.
අපේක්ෂකයාගේ නම යම් ඡන්ද හිමියකු විසින් යෝජනා කරනු ලබන විට ඡන්ද හිමි නාමලේඛනයේ නම ඇතුළත් ඡන්ද හිමියකු විසින් නාමයෝජනා පත්‍රය අත්සන් කළ යුතු වන අතර නාමයෝජනා ඉදිරිපත් කළ පසු ප්‍රතිවිරුද්ධ අපේක්ෂකයකු විසින් හෝ ප්‍රතිවිරුද්ධ අපේක්ෂකයාගේ නාමයෝජනා පත්‍රය අත්සන් කරනු ලැබූ තැනැත්තකු විසින් හෝ යම් අපේක්ෂකයකු සම්බන්ධයෙන් විරෝධතා ගොනු කිරීමට ඇත්නම් කොමසාරිස්වරයා විසින් නියම කරනු ලබන වෙලාව තුළදී විරෝධතා දැක්වීමට හැකි වේ.
මෙවර නාමයෝජනා සම්බන්ධයෙන් අගෝස්තු 15 වැනි දිනම පෙ.ව. 9.00 සිට පෙ.ව. 11.30 දක්වා කාල සීමා තුළ විරෝධතා දැක්වීමට අවස්ථාව ලබා දී ඇත.
නාමයෝජනා කැඳවීමේ දිනයේ සිට සති 2ක් ඇතුළතදී මැතිවරණ කොමසාරිස් විසින් එක් එක් ඡන්ද බලප්‍රදේශය තුළ ඡන්ද මධ්‍යස්ථාන පවත්වන ස්ථාන සඳහන් කරමින් දැන්වීමක් ගැසට් පත්‍රයේ පළ කළ යුතු අතර එක් ග්‍රාම නිලධාරී කොට්ඨාසයක් සඳහා එක් ඡන්ද මධ්‍යස්ථානය බැගින් එම ඡන්ද බලප්‍රදේශය තුළම පිහිටු වීම කළ යුතු වන අතර විශේෂ අවස්ථාවකදී මෙම තත්ත්වය වෙනස් වීමට හැකියාව පවතී.
