පාකිස්තානයේ කාන්තා ලිංගික හිංසන සහ ජාවාරම් සැලකිය යුතු ලෙස ඉහළ ගොස් ඇතැයි එරට මානව හිමිකම් සංවිධාන වාර්තා මගින් හෙළි වී ඇතැයි විදෙස් මාධ්‍ය සඳහන් කළේය. මේ වනවිට එරට කාන්තාවන්ගේ ආරක්ෂාව පහළට වැටී ඇතැයි ද, එවැනි සිදුවීම් වළක්වා ගැනීමට පාකිස්තාන අපරාධ නීති පද්ධතියෙන් නීතිරෙගුලාසි රැසක් පනවා තිබුණද, ලිංගික හිංසන සිදුවීම් විශාල ප්‍රමාණයක් මේ වන විටත් විසඳුමකින් තොරව වසා දැමීමට සිදුවී ඇතැයි ද පාකිස්තාන මානව හිමිකම් සංවිධාන පෙන්වා දී ඇති බව විදෙස් මාධ්‍ය වැඩිදුරටත් වාර්තා කළේය.
පසුගිය වසර තුන ඇතුළත පාකිස්තානයේ මානව හිමිකම් අමාත්‍යාංශයට කාන්තා හිංසන සිදුවීම් 63,000ක් වාර්තා වී ඇති අතර, එම සිදුවීම්වලින් 80%ක්ම ගෘහස්ථ හිංසන බව පාකිස්තානයේ ජාතික මානව හිමිකම් කොමිසම සඳහන් කර ඇතැයි ද වාර්තා වේ. බාලවයස්කාර දැරියන් බලහත්කාරයෙන් විවාහ කරදීමේ සිදුවීම් ද එම වර්ගීකරණයට ඇතුළත් බවත්, මේ පිළිබඳ එක්සත් ජාතීන්ගේ සංවිධානයේ අවධානයත් යොමු වී ඇති බවත් විදෙස් මාධ්‍ය වැඩිදුරටත් වාර්තා කළේය.
