ජනතාව අසීරුවෙන් ජීවත් වන මොහොතක ඒ පිළිබඳව නොසිතා තමන්ගේ ආදායම් මාර්ග ගැන පමණක් සිතන පිරිසක් ආණ්ඩුවේ සිටින බව පාර්ලිමේන්තු මන්ත්‍රී මුජිබර් රහුමාන් මහතා පැවැසීය.
මන්ත්‍රීවරයා මේ බව පැවැසුවේ ඊයේ (01) කොළඹ විපක්ෂ නායක කාර්යාලයේ පැවති මාධ්‍ය හමුවට සහභාගි වෙමිනි.
එහිදී වැඩිදුරටත් අදහස් දැක්වූ මන්ත්‍රීවරයා මෙලෙස ද කීවේය.
“බදු ගෙවීම පැහැර හැරීම නිසා බිලියන 1860ක්, වැට් බද්ද පැහැර හැරීම නිසා බිලියන 678ක්, 2023 බදු සහන දීම නිසා බිලියන 972ක් රටට අහිමි වෙලා තිබෙනවා. ඒ අනුව රටට ලැබිය යුතු මුළු මුදල රුපියල් බිලියන 2716ක්. මේ බදු ප්‍රමාණය අය කර ගන්න රජයට කිසිදු වැඩපිළිවෙළක් නෑ. සීනි බදු වංචාව රුපියල් බිලියන 15,000කට වඩා වැඩියි. මේ මුදල් අය කර ගැනීමට රජයට කිසිදු වැඩපිළිවෙළක් නෑ. නමුත් ආණ්ඩුව වැඩ කරන ජනතාව ගෙවන සියලු බදු වගේම විදුලි බිල, ජල බිල, ගෑස් මිල වැඩි කර සමාන්‍ය ජනතාව පීඩාවට පත් කර රාජ්‍ය ආදායම වැඩි කරන්න කටයුතු කරනවා. නමුත් මැති ඇමැතිවරුන් දූෂිත ගනුදෙනු කරමින් වැඩ කරන ජනතාවගේ මුදල් මංකොල්ලකනවා. මේ වංචා දූෂණ නතර කරන්න ආණ්ඩුවට කිසිදු වැඩපිළිවෙළක් නෑ. රටේ ජනතාව අසීරුවෙන් ජීවත්වන මොහොතක ඒ ගැන නොසිතා තමන්ගේ ආදායම ගැන පමණක් හිතන ආණ්ඩුවක් තමයි වර්තමානයේ තිබෙන්නේ.
වැඩ කරන ජනතාවගේ බදු මුදල්වලින් අධ්‍යාපනය ලබා රටට සේවය කරන විද්‍යාඥයන් සිටින්නේ සමඟි ජන බලවේගය සමඟයි. ජාතික ජන බලවේගය සංවිධාන කළ සමුළුවට එන විද්‍යාඥයන් දේශනය ඉවර කර නැවත විදෙස්ගත වෙනවා. ඒ වගේ විද්‍යාඥයන් පිරිසක් ගෝඨාභය රාජපක්ෂ බලයට ගේන්නත් කටයුතු කළා. අවසානයේ ඒ ආ විද්‍යාඥයන් පිරිස ඔවුන් පදිංචි රටවලට ගියා. මෙරට ජනතාව ඉන්ධන, ගෑස් පෝලිම්වල හිටියා. ලංකාවේම ඉගෙනගෙන ලංකාවේ පදිංචි වෙලා ලංකාව ගොඩගන්න වෑයම් කරන විද්‍යාඥයන් පිරිසක් සමඟි ජන බලවේගය සමඟ එකතු වෙලා සිටිනවා. ඒ ගැන සමඟි ජන බලවේගයට ආඩම්බරයි. ඔවුන් තමයි ඇත්ත දේශප්‍රේමීන්. ලංකාවේම ඉගෙනගෙන ලංකාවේ සේවය කරන විද්‍යාඥයන් කවදාවත් රට දාලා යන්නේ නෑ. ඔවුන් රට ගොඩගන්න සමඟි ජන බලවේගය සමඟ එකතු වෙලා සිටිනවා.”
