- වැස්සත් නෑ: විශාල බොරදිය ජල පහරක් ගලාගෙන යනවා
- අක්කර 15ක කොටසක් දැනටමත් නාය ගිහින්
- පවුල් 10ක් ඉවත් කරලා
- ආපදා කළමනාකරණ මධ්‍යස්ථානයේ බදුල්ල දිස්ත්‍රික් සහකාර අධ්‍යක්ෂ
ඇල්ල කරඳගොල්ල මලිත්තගොල්ල ප්‍රදේශයේ නායයෑම තවදුරටත් සක්‍රීය වෙමින් පවතින අතර මේ නිසාවෙන් ඇල්ල වැල්ලවාය ප්‍රධාන මාර්ගයට දැඩි අවධානමක් මතු වී ඇතැයි ආපදා කළමනාකරණ මධ්‍යස්ථානයේ බදුල්ල දිස්ත්‍රික් සහකාර අධ්‍යක්ෂ ඊ.එම්.එල් උදයකුමාර (26) පස්වරුවේ පැවසීය. දැනට වර්ෂාව නැතිව වියළි දේශගුණික තත්ත්වයත් ඇල්ල ප්‍රදේශයේ පැවතියද ,මලිත්තගොල්ල ප්‍රදේශයේ මේ නායයෑම සක්‍රීය වෙමින් පවතින ස්ථානයේ විශාල බොරදිය ජල පහරක් ගලා යමින් පවතින බවත් දැනටමත් ගස්කොළන් රැසක් බිමට කඩා වැටී ගම්මානයේ නිවාස කීපයක් ද කැඩී හානි වී ඇතැයි හෙතෙම කීය. මේ නායයෑම 2019 වසරේ ආරම්භ වූ අතර එතැන් පටන් විටින් විට මේ නායයෑම සක්‍රීය වෙමින් පවතින බවත් යළි (24) එක්වරම මේ නායයෑම යළි සක්‍රීය වෙමින් විශාල බොරදිය ජලපහරක් ගලායමින් පවතින බවත් ආපදා කළමනාකරණ මධ්‍යස්ථානයේ බදුල්ල දිස්ත්‍රික් සහකාර අධ්‍යක්ෂ ඊ.එම්.එල් උදයකුමාර පවසයි .
මේ මලිත්තගොල්ල ප්‍රදේශයේ පදිංචි පවුල් 10ක් ( 24) මේ ස්ථානයෙන් ඉවත් කර ආරක්ෂිත ස්ථාන කරා යොමු කළ බවත් ඔවුන් දැනට සිය නෑදෑ හිතවතුන්ගේ නිවාසවල තාවකාලිකව නතර වී සිටින බවත් හෙතෙම පැවසීය. කරඳගොල්ල මලිත්තගොල්ල ප්‍රදේශයේ දැනට අක්කර 15ක පමණ කොටසක් දැනට නායයෑමට ලක්ව ඇති අතර මේ නායයෑමට ලක් වූ ස්ථානයට තරමක් නුදුරින් උමා ඔය ජල ව්‍යාපෘතිය පිහිටා ඇති බවත් සඳහන් කළේය.
නමුත් මින් එම ව්‍යාපාරයට බලපෑමක් ඇති වේද නැතිවේවිදැයි තමන්ට වගකීමෙන් ඒ සම්බන්ධයෙන් ප්‍රකාශයක් කීමට නොහැකි බවත් නමුත් මේ කරඳගොල්ල මලිත්තගොල්ල ප්‍රදේශයේ නායයෑම නිසාවෙන් ඇල්ල වැල්ලවාය ප්‍රධාන මාර්ගයට විශේෂයෙන් එය බලපාන බව ද උදයකුමාර පැවසීය. ඇල්ල වැල්ලවාය ප්‍රධාන මාර්ගයට මේ නායයෑමෙන් බලපෑමක් ඇති වුවහොත් එය ඇල්ල නගරයේ සංචාරක ව්‍යාපාරයට දැඩි ලෙස බලපෑමක් එල්ල වන බව ද කීය.
දැනට මේ නායයෑමට එකම විකල්පය මලිත්තගොල්ල ප්‍රදේශයේ ගලා බසින බොරදිය ජලපහර මතුපිට ගලායෑමට ඉඩ නොදී ජලපහර වෙනත් දිශාවකට හැරවීම බවත් එමගින් තාවකාලිකව හෝ මේ නායයෑම වළක්වා ගත හැකි බව ද පැවසීය. මේ සම්බන්ධයෙන් (25) බදුල්ල දිස්ත්‍රික් ලේකම්,ඇල්ල ප්‍රාදේශීය ලේකම් ආපදා කළමනාකරණ මධ්‍යස්ථානය,ඇල්ල පොලිසිය ඇතුළු වගකිවයුතු අංශවල නිලධාරීන් එක්වී සාකච්ඡා කළ බවත්කඩිනමින් මෙයට ක්‍රියාමාර්ගයක් ගත යුතු බවත් උදයකුමාර වැඩිදුරටත් සඳහන් කළේය.
එසේ නොවුණොත් මේ කරඳගොල්ල මලිත්තගොල්ල ප්‍රදේශයේ නායයෑම තවදුරටත් සක්‍රීය වී ඇල්ල වැල්ලවාය ප්‍රධාන මාර්ගය කරඳගොල්ල ප්‍රදේශයෙන් මුළුමනින්ම වැසීගොස් ඇල්ල වැල්ලවාය මාර්ගයට විකල්පයක් නැති වී යන බවත් හෙතෙම පැවසීය.
