වැටුප් ගැටලුවක් මුල් කර ගනිමින් රේගු නිලධාරීන් විසින් ආරම්භ කර ඇති වෘත්තීය ක්‍රියාමාර්ගය හේතුවෙන් වරාය තුළ මේ වන විට නිෂ්කාශනය සඳහා බහාලුම් විශාල ප්‍රමාණයක් ගොඩගැසී ඇති බව බහාලුම් ප්‍රවාහන රථ හිමිකරුවන්ගේ සංගමය පවසනවා.
මේ වන විට ආහාර සහ ඖෂධ අඩංගු බහාලුම් පමණක් නිෂ්කාශනය කිරීම සිදුකරන බවයි මාධ්‍ය වෙත අදහස් දක්වමින් ඔහු සඳහන් කළේ.
කෙසේ නමුත් එදිනෙදා අවශ්‍ය වන අනෙකුත් ද්‍රව්‍ය සහ කර්මාන්ත සඳහා අවශ්‍ය අමුද්‍රව්‍ය අඩංගු බහාලුම් 4,000ක් පමණ වරාය පරිශ්‍රය තුළ නිෂ්කාශනය නොකර පවතින බවයි එම සංගමයේ සභාපති සනත් මංජුල ප්‍රකාශ කළේ.
රාමසාන් උපවාස සමය සහ එළඹෙන සිංහල හා දෙමළ අලුත් අවුරුද්ද හේතුවෙන් අත්‍යාවශ්‍ය ආහාර ද්‍රව්‍ය ඇතුළත් බහාලුම් විශාල ප්‍රමාණයක් ඉදිරියේදී නෞකා මගින් වරාය වෙත රැගෙන ඒමට නියමිත බවත් මේ හේතුවෙන් වරාය තුළ අධික තදබදයක් නිර්මාණය වන බවයි ඔහු පෙන්වා දෙන්නේ.
එබැවින් මේ වන විට වරාය තුළ පවතින බහාලුම් සහ ඉදිරියේදී වරාය වෙත පැමිණෙන බහාලුම් නිෂ්කාශනය කර ගත නොහැකි වුවහොත් ඉදිරියේදී භාණ්ඩ හිඟයක්ද ඇතිවිය හැකි බවයි බහාලුම් ප්‍රවාහන රථ හිමිකරුවන්ගේ සංගමය වැඩිදුරටත් සඳහන් කළේ.
