ශ්‍රී ලංකාවේ ආර්ථිකය ගොඩනැංවීම වෙනුවෙන් ජනාධිපති රනිල් වික්‍රමසිංහ විසින් ක්‍රියාත්මක කර ඇති වැඩපිළිවෙළ බෝරා ප්‍රජාවේ ආධ්‍යාත්මික නායක ආචාර්ය අතිඋතුම් සෙයියදිනා මුෆද්දල් සෙයිෆුද්දීන් සහෙබ්තුමාගේ ඇගයීමට ලක් විය. මේ බව ප්‍රකාශ කෙරු‍ණේ ආචාර්ය සෙයියදිනා මුෆද්දල් සෙයිෆුද්දීන් සහෙබ්තු මා සහ ජනාධිපති රනිල් වික්‍රමසිංහ අතර හමුවක් පැජට් පාර පිහිටි ජනාධිපති නිල නිවෙසේදී ඊයේ (03) සිදු වූ අවස්ථාවේදීය. ආචාර්ය සෙයියදිනා මුෆද්දල් සෙයිෆුද්දීන් සහෙබ් තුමා සමඟ ජනාධිපති රනිල් වික්‍රමසිංහ සුහද කතාබහක නිරත විය. එමෙන්ම බම්බලපිටිය බෝරා පල්ලිය ආශ්‍රිතව පැවැත්වෙන බෝරා සමුළුව මේ වසරේදී පැවැත්වීම පිළිබඳවද මෙහිදී ජනාධිපතිවරයාගේ අවධානයට යොමු කෙරිණි. බෝරා ප්‍රජාව විසින් පසුගිය වසර 4ක් පුරා සිදු කළ ආගමික සේවා ඇතුළු විවිධ වැඩසටහන් ඇතුළත් ග්‍රන්ථයක්ද මෙහිදී ජනාධිපති රනිල් වික්‍රමසිංහ වෙත පිළිගැන්විණි. බෝරා ප්‍රජාවේ නායකයන් ඇතුළු නියෝජිත පිරිසක් මේ අවස්ථාවට එක්ව සිටි අතර, මිලියනයකට අධික බෝරා ප්‍රජාවේ සාමාජිකයෝ ඉන්දියාව, පාකිස්තානය, අමෙරිකා එක්සත් ජනපදය, එක්සත් රාජධානිය, කැනඩාව, ශ්‍රී ලංකාව සහ ඔස්ට්‍රේලියාව ඇතුළු රටවල් ගණනාවක වාසය කරති.
