අස්වැසුම ප්‍රතිලාභ වැඩසටහන යටතේ ප්‍රථමයෙන්ම තෝරා ගත් ලක්ෂ විස්සක ප්‍රතිලාභීන් සංඛ්‍යාවෙන් ලක්ෂ පහළොවකට මේ වන විට ප්‍රතිලාභ ගෙවා අවසන් බවත්, ඉතිරි ප්‍රතිලාභීන්ට ඉදිරි මාස කිහිපයේදී ප්‍රතිලාභ ගෙවා අවසන් කිරීමට බලාපොරොත්තු වන බවත් මුදල් රාජ්‍ය ඇමැති ශෙහාන් සේමසිංහ මහතා සඳහන් කළේය. රාජ්‍ය ඇමැතිවරයා මේ බව කියා සිටියේ පෙරේදා (02) මාධ්‍යවේදීන් නැඟූ ප්‍රශ්නවලට පිළිතුරු දෙමිනි.
එහිදී වැඩිදුරටත් අදහස් දක්වමින් රාජ්‍ය ඇමැතිවරයා මෙලෙස ද කීවේය.
“අස්වැසුම ප්‍රතිලාභ වැඩසටහන ශක්තිමත් යන්ත්‍රණයක් බවට පත් කර දිළිඳුම පවුල් තෝරාගෙන ප්‍රතිලාභ ගෙවීමටත්, ලක්ෂ විස්සක් වූ ප්‍රතිලාභී සංඛ්‍යාව ලක්ෂ විසි හතරක් දක්වා වැඩි කිරීමටත් කටයුතු කරනවා. මේ අස්වැසුම ප්‍රතිලාභ හිමි කරගැනීමට අසත්‍ය තොරතුරු ඉදිරිපත් කළ පුද්ගලයන් හත්දහසක් පමණ දෙනකු හඳුනාගෙන තිබෙනවා. එම ප්‍රතිලාභ හිමි කර ගත් පුද්ගලයන් වෙනුවෙන් පනතට අනුව සුබසාධක ප්‍රතිලාභ මණ්ඩලයෙන් නීතිය ක්‍රියාත්මක කරනවා.
ජනප්‍රිය තීන්දු තීරණ වෙනුවට නිවැරදි ප්‍රතිසංස්කරණ ක්‍රියාවලියකින් ලෝක අර්බුදයක් හමුවේ ද රටේ අනාගතය තහවුරු කිරීමට අවශ්‍ය ක්‍රියාමාර්ග ගන්නවා. රාජ්‍ය ආයතන ප්‍රතිව්‍යුහගතකරණය සම්බන්ධයෙන් සංවාද ඇතිවීම යහපත් කරුණක්. එයින් යහපත් තීරණ ගැනීමට හැකියාව පවතිනවා. මෙහිදී රාජ්‍ය ආයතන ප්‍රතිව්‍යුහගතකරණය සම්බන්ධයෙන් වන විනිවිදභාවය ආරක්ෂා කිරීමට රජය බැඳී සිටිනවා.”
